ఏడేళ్ల బాలికను చంపినందుకు తమిళనాడు పోలీసులు ఓ వ్యక్తిని, అతడి స్నేహితుడిని అదుపులోకి తీసుకున్నారు. ఇంతకూ ఆ బాలికను చంపడానికి కారణమేమిటో తెలుసా..? రిమోట్ అడగడమే..! ఈ ఘటన తమిళనాడు రాష్ట్రం తూత్తుకుడి జిల్లాలో చోటుచేసుకుంది.

సతాంకుళమ్ టౌన్ కు చెందిన అమ్మాయి అప్పుడప్పుడు పొరుగింట్లో టీవీ చూడడానికి వెళుతూ ఉంటుంది. వారి ఇంట్లో కరెంట్ లేకపోవడంతో ఆమె టీవీ చూడడానికి వెళ్ళింది. ఆ ఇంట్లో ఉన్న వ్యక్తి అప్పటికే తన తండ్రితో గొడవపడి కోపంలో ఉన్నాడు. ఇంతలో ఆ బాలిక టీవీ రిమోట్ ఇవ్వాలని.. ఛానల్ మార్చుకుంటానని సాధారణంగా అడిగింది. దీంతో ఆ వ్యక్తి పట్టరాని కోపంతో ఆ బాలిక గొంతు నులిమి చంపేశాడు. ఆ బాలిక శవాన్ని ప్లాస్టిక్ డ్రమ్ లో దాచేశాడు. తన స్నేహితుడి సహాయంతో ఆ బాలిక శవాన్ని దగ్గరలో ఉన్న కాలువ దగ్గర పాతేశాడు. ఆ బాలిక ఇంటికి రెండు కిలోమీటర్ల దూరంలో కాలువ వుంది. ఆ బాలిక తల్లి రోజూ కూలీకి వెళ్ళేది.

‘ఇద్దరు వ్యక్తులను అరెస్ట్ చేశాం. ఈ ఘటన ఉదయం 11:30- 12:00 మధ్య చోటుచేసుకుంది. మధ్యాహ్నం 2:30 సమయంలో బాలిక కనిపించకుండా పోయిన సమాచారం మాకు అందింది. కొన్ని గంటల్లోనే ఆమెను చంపిన వ్యక్తిని పట్టుకున్నాం. అమ్మాయిని చంపిన వ్యక్తికి ఉదయానే తన తండ్రితో గొడవ అయ్యింది. అందుకే ఈ దారుణానికి ఒడిగట్టాడు. నిందితుడు నేనే బాలికను చంపానని ఒప్పుకున్నాడు. బాలిక మృతదేహాన్ని తిరునల్వేలి గవర్నమెంట్ ఆసుపత్రికి పోస్ట్ మార్టం నిమిత్తం పంపించాం. ఇన్వెస్టిగేషన్ జరుగుతోంది’ అని తూత్తుకుడి ఎస్పీ జయకుమార్ మీడియాకు తెలిపారు.

ఈ దారుణానికి పాల్పడిన వ్యక్తి డ్రగ్స్ మత్తులో ఉన్నాడని.. మైనర్ బాలిక మీద లైంగికంగా కూడా దాడి చేసి ఉంటాడని స్థానికంగా ఆరోపణలు వచ్చాయి. పోలీసులు దీనిపైన కూడా విచారిస్తూ ఉన్నారు. పోస్కో యాక్ట్ కింద ఆ ఇద్దరిపై కేసు నమోదు చేశారు.

జులై నెలలోనే తమిళనాడు రాష్ట్రంలో ఏడేళ్ల మైనర్ బాలికను చంపేసిన ఘటన తీవ్ర విమర్శలకు దారి తీసింది. చనిపోయిన ఏడేళ్ల దళిత బాలిక ముఖం మీద తీవ్ర గాయాలు అయ్యాయి. తమిళనాడు లోని పుదుకోట్టై జిల్లాలో ఈ ఘటన చోటుచేసుకుంది. ఆ బాలిక గ్రామ శివార్లలో అటవీ ప్రాంతానికి దగ్గరలో ఆ అమ్మాయి శవం పడి ఉండడాన్ని స్థానికులు చూశారు. బాలిక ఇంటి దగ్గర ఉన్న రవి అనే 25 సంవత్సరాల వ్యక్తి ఈ దారుణానికి పాల్పడినట్లు తెలుస్తోంది. ఆ బాలికను రవి లైంగికంగా వేధించినట్లు సీనియర్ పోలీసు అధికారులు తెలిపారు.

వంశికుమార్ తోట

నాపేరు వంశికుమార్. నేను న్యూస్ మీటర్ తెలుగులో జర్నలిస్ట్ గా పనిచేస్తున్నాను. గతంలో నేను ఆంధ్రప్రభ, ఆంధ్ర‌జ్యోతిలో పనిచేశాను. జర్నలిజం పట్ల నాకు ఉన్న ఇష్టం, ఆసక్తితో నేను ఈ వృత్తిని ఎంచుకున్నాను.

Leave a Reply

Your email address will not be published. Required fields are marked *