'గ్రేడ్ A+'ను ర‌ద్దు చేసే యోచ‌న‌లో BCCI.. రోహిత్-కోహ్లీకి భారీ నష్టం..!

బోర్డ్ ఆఫ్ కంట్రోల్ ఫర్ క్రికెట్ ఇన్ ఇండియా (BCCI) కొత్త సెంట్రల్ కాంట్రాక్ట్ సిస్టమ్‌ను ప్రవేశపెట్టబోతోంది. దీని కింద గ్రేడ్ A ప్లస్ కేటగిరీ రద్దు చేయబడుతుందని నివేదికలు చెబుతున్నాయి. బీసీసీఐ వర్గాల సమాచారం ప్రకారం.. ఈ కొత్త మోడల్‌కు బోర్డు ఆమోదం తెలిపితే.. టీమిండియా దిగ్గజాలు విరాట్ కోహ్లీ, రోహిత్ శర్మలను గ్రేడ్-బిలో ఉంచే అవ‌కాశం ఉంది.

అజిత్ అగార్కర్ నేతృత్వంలోని సెలక్షన్ కమిటీ సెంట్రల్ కాంట్రాక్ట్ నిర్మాణంలో భారీ మార్పులు చేయాలని ప్రతిపాదించింది. కమిటీ A+ కేటగిరీని (రూ. 7 కోట్లు) తొలగించి, A, B, C అనే మూడు కేటగిరీలు మాత్రమే ఉండాలని సిఫార్సు చేసింది. ఇలాంటి పరిస్థితుల్లో బీసీసీఐ ఈ కొత్త మోడల్‌ను ఆమోదిస్తుందా లేదా అన్నది వచ్చే అపెక్స్ కౌన్సిల్ సమావేశంలో తేలుతుందని భావిస్తున్నారు.

విరాట్‌ కోహ్లి, రోహిత్‌ శర్మల గ్రేడ్ ప‌రిస్థితేంటి.?

NDTV నివేదిక ప్రకారం.. ఈ మోడల్ ఆమోదం పొందినట్లయితే ప్రస్తుతం గ్రేడ్-ఎ ప్లస్ కేటగిరీలో చేర్చబడిన విరాట్ కోహ్లీ, రోహిత్ శర్మలు గ్రేడ్-బికి ప‌డిపోతారు.

BCCI సెంట్రల్ కాంట్రాక్ట్ జాబితా ఎవరు పొందుతారు.?

BCCI నిబంధనల ప్రకారం.. ఒక సీజన్‌లో 3 టెస్ట్ మ్యాచ్‌లు లేదా 8 ODIలు లేదా 10 T20 మ్యాచ్‌లు ఆడిన ఆటగాళ్లకు సెంట్రల్ కాంట్రాక్ట్ ఇవ్వబడుతుంది. బోర్డు అంతకుముందు హర్షిత్ రాణాకు రాయితీని ఇచ్చింది. అతడు భారత్ త‌రుపున‌ రెండు టెస్టులు, ఐదు ODIలు, ఒక T20 మ్యాచ్ ఆడిన తర్వాత సెంట్రల్ కాంట్రాక్ట్‌లో చోటు సంపాదించాడు.

BCCI సెంట్రల్ కాంట్రాక్ట్ 2024-25 జాబితా

గ్రేడ్ A+ (న‌లుగురు ఆటగాళ్లు- రోహిత్ శర్మ, విరాట్ కోహ్లీ, జస్ప్రీత్ బుమ్రా, రవీంద్ర జడేజా)

గ్రేడ్ A (ఆరుగురు ఆటగాళ్లు- మహ్మద్ సిరాజ్, KL రాహుల్, శుభ్‌మన్ గిల్, హార్దిక్ పాండ్యా, మహ్మద్ షమీ, రిషబ్ పంత్)

గ్రేడ్ B (ఐదుగురు ఆటగాళ్లు- సూర్యకుమార్ యాదవ్, కుల్దీప్ యాదవ్, అక్షర్ పటేల్, యశస్వి జైస్వాల్, శ్రేయాస్ అయ్యర్)

గ్రేడ్ సి (19 మంది ఆటగాళ్లు- రింకు సింగ్, తిలక్ వర్మ, రుతురాజ్ గైక్వాడ్, శివమ్ దూబే, రవి బిష్ణోయ్, వాషింగ్టన్ సుందర్, ముఖేష్ కుమార్, సంజు శాంసన్, అర్ష్‌దీప్ సింగ్, ప్రసిద్ధ్ కృష్ణ, రజత్ పటీదార్, సర్ఫరాజ్ ఖాన్, ఆకాష్ దీప్, నితీష్ రెడ్డి, ధృవ్ జురైల్, వరుణ్ చక్రవర్తి, ఇషాన్ కిషన్, అభిషేక్ శర్మ, హర్షిత్ రాణా)

BCCI సెంట్రల్ కాంట్రాక్ట్ ప్లేయర్స్ ఎంత పొందుతారు.?

గ్రేడ్ A+- సంవత్సరానికి రూ. 7 కోట్లు

గ్రేడ్ A- సంవత్సరానికి రూ. 5 కోట్లు

గ్రేడ్ బి- సంవత్సరానికి రూ. 3 కోట్లు

గ్రేడ్ సి- సంవత్సరానికి రూ. 1 కోటి