బెంగళూరు తొక్కిసలాట ఘటన.. విరాట్‌ కోహ్లీ భావోద్వేగం

జూన్ 4, బుధవారం బెంగళూరు నగరంలో రాయల్ ఛాలెంజర్స్ బెంగళూరు ఐపీఎల్ 2025 విజయోత్సవ వేడుకల సందర్భంగా ఎం చిన్నస్వామి స్టేడియం వెలుపల జరిగిన తొక్కిసలాటలో11 మంది ప్రాణాలు కోల్పోవడం, పలువురికి గాయాలు కావడం తనను బాధించిందని స్టార్‌ క్రికెటర్‌ విరాట్ కోహ్లీ అన్నారు. కిక్కిరిసిన స్టేడియంలో ఆర్సీబీ గౌరవ ల్యాప్‌ను నడిపించిన కోహ్లీ, జట్టు అధికారిక ప్రకటనను ఇన్‌స్టాగ్రామ్‌లో పంచుకున్నాడు. ఈ విషాద సంఘటనపై తన విచారాన్ని వ్యక్తం చేస్తూ వ్యక్తిగత సందేశాన్ని ప్రకటించారు. "మాటలు చెప్పలేకపోతున్నాను. పూర్తిగా బాధపడ్డాను" అని అతను హార్ట్‌ బ్రేక్‌ ఎమోజీతో రాసుకొచ్చాడు.

విజేత జట్టును చూసేందుకు వేలాది మంది అభిమానులు ప్రయత్నిస్తున్న సమయంలో వేదిక వెలుపల జరిగిన తొక్కిసలాటలో 11 మంది మరణించగా, 47 మంది గాయపడ్డారు. 35,000 మంది సామర్థ్యం కలిగిన స్టేడియంకు రెండు లక్షలకు పైగా అభిమానులను ఆకర్షించిన ఈ వేడుక, బయట జరిగిన సంఘటన గురించి నిర్వాహకులకు సమాచారం అందిన తర్వాత కేవలం 20 నిమిషాలకు కుదించబడింది. ఈ కార్యక్రమానికి కోచ్ ఆండీ ఫ్లవర్, మెంటర్ దినేష్ కార్తీక్ సహా అన్ని ఆర్సీబీ ఆటగాళ్ళు, వారి సహాయక సిబ్బంది హాజరయ్యారు. అంతకుముందు విమానాశ్రయంలో ఆర్సీబీ బృందాన్ని స్వాగతించిన కర్ణాటక ఉప ముఖ్యమంత్రి డికె శివకుమార్ కూడా సాయంత్రం కార్యక్రమంలో పాల్గొన్నారు.

"పరిస్థితి గురించి తెలిసిన వెంటనే, మేము వెంటనే మా కార్యక్రమాన్ని సవరించాము. స్థానిక పరిపాలన మార్గదర్శకత్వం, సలహాలను అనుసరించాము" అని ఆర్సీబీ ప్రకటనలో తెలిపింది. ఐకానిక్ వేదికపై తొలిసారిగా ఐపీఎల్ ట్రోఫీని ప్రదర్శించిన సందర్భంగా విరాట్ కోహ్లీ స్టేడియం లోపల ఆర్‌సిబి అభిమానులను ఉద్దేశించి ప్రసంగించాడు . క్రీడా ప్రపంచంలో అత్యుత్తమ మద్దతుదారుల బృందంగా అభిమానులను అభివర్ణిస్తూ కోహ్లీ భావోద్వేగపూరిత సందేశాన్ని పంచుకున్నాడు. "ఇది ఇకపై 'ఈ సాలా కప్ నమ్దే' కాదు - ఇది 'ఈ సాలా కప్ నమ్దు'. మేము దానిని పూర్తి చేసాము," అని కోహ్లీ అన్నాడు.

"ఈ విజయం కేవలం ఆటగాళ్లకే కాదు - అభిమానులకూ, ఈ అద్భుతమైన నగర ప్రజలకూ. 18 సంవత్సరాలుగా ఆర్‌సిబిని ఆటుపోట్లలో కూడా ఆదరించిన వారు. ప్రపంచంలో మరెక్కడా ఇలాంటి అభిమానులను నేను చూడలేదు. మీ అందరికీ అభినందనలు" అని విరాట్‌ కోహ్లీ అన్నారు. తొక్కిసలాట జరిగిందనే ప్రాథమిక నివేదికలు వెలువడిన తర్వాత కూడా నిర్వాహకులు ఎం. చిన్నస్వామి స్టేడియంలో కార్యక్రమాన్ని ఎందుకు కొనసాగించారనే దానిపై ప్రశ్నలు తలెత్తుతున్నాయి .