Viral Video : జ‌ట్టు మొత్తం కాదు.. భారీ భద్రత న‌డుమ అక్క‌డ‌కు చేరుకున్న కోచ్‌, కోహ్లీ, పంత్‌..!

బంగ్లాదేశ్ క్రికెట్ జట్టు ప్ర‌స్తుతం భారత పర్యటనలో ఉంది. ఇరు జట్ల మధ్య 2 టెస్టు మ్యాచ్‌ల సిరీస్ జరుగుతోంది. చెన్నై వేదికగా జరిగిన తొలి టెస్టులో భారత జట్టు 280 పరుగుల తేడాతో విజయం సాధించింది. ఇప్పుడు రెండో మ్యాచ్ కాన్పూర్‌లోని గ్రీన్ పార్క్‌లో జరగనుంది. ఇందుకోసం జట్టులోని కొందరు ఆటగాళ్లు కాన్పూర్ చేరుకున్నారు. ప్రధాన కోచ్ గౌతం గంభీర్‌తో పాటు మాజీ కెప్టెన్ విరాట్ కోహ్లీ, వికెట్ కీపర్ బ్యాట్స్‌మెన్ రిషబ్ పంత్ మంగళవారం కాన్పూర్ చేరుకున్నారు.

చెన్నై టెస్టు కేవలం 4 రోజుల్లోనే ముగిసింది. రెండో టెస్టు కోసం విరాట్ కోహ్లీ, రిషబ్ పంత్, కోచ్ గౌతం గంభీర్ ఢిల్లీకి బయల్దేరారు. ఢిల్లీ నుంచి నేరుగా కాన్పూర్ చేరుకున్నారు. కట్టుదిట్టమైన భద్రత మధ్య ముగ్గురినీ కాన్పూర్ విమానాశ్రయం నుంచి హోటల్‌కు తరలించారు. త్వరలో మొత్తం భారత జట్టు కూడా కాన్పూర్ చేరుకోనుంది.

సెప్టెంబర్ 27 నుంచి జరిగే టెస్టుకు వివిధ దశల్లో ఆటగాళ్లు వస్తున్నారని యూపీసీఏ మీడియా మేనేజర్ మహ్మద్ ఫహీమ్ తెలిపారు. ఇందులో కోచ్ గౌతమ్ గంభీర్, విరాట్ కోహ్లీ, పంత్ ఇండిగో విమానం నుంచి ముందుగా విమానాశ్రయంలో దిగారు. అనంతరం ముంబై నుంచి వచ్చే విమానంలో రోహిత్ శర్మ, కేఎల్ రాహుల్, శుభమన్ గిల్, అభిషేక్ నాయర్ నగరానికి చేరుకుంటారు. టీమిండియాలోని మిగిలిన ఆటగాళ్లు, బంగ్లాదేశ్ జట్టు ఆటగాళ్లు ఒకే సారి న‌గ‌రానికి చేరుకుంటార‌ని తెలిపారు.