టీమ్ఇండియా మాజీ క్రికెట‌ర్ వినోద్ కాంబ్లీపై కేసు న‌మోదు.. భార్య‌ను కొట్టాడ‌ట‌

టీమ్ఇండియా మాజీ క్రికెటర్ వినోద్ కాంబ్లీ మరోసారి వివాదంలో చిక్కుకున్నాడు. మ‌ద్యం తాగి వ‌చ్చి దాడి చేశాడ‌ని అత‌డి భార్య ఆండ్రియా హెవిట్ పోలీసుల‌కు ఫిర్యాదు చేసింది. త‌న‌పై వంట ప్యాన్ హ్యాండిల్ విసిరాడ‌ని, దీంతో త‌న త‌ల‌కు గాయ‌మైంద‌ని ఆండ్రియా ఆరోపించింది. ఆండ్రియా ఫిర్యాదు మేర‌కు కేసు న‌మోదు చేసిన‌ట్లు ముంబై పోలీసులు తెలిపారు.

శుక్రవారం (ఫిబ్రవరి 3) మధ్యాహ్నం 1 గంటల నుంచి 1.30 గంటల మధ్య మద్యం మత్తులో కాంబ్లీ తన బాంద్రా ఫ్లాట్‌కు చేరుకున్నాడు. భార్యను వేధించడం ప్రారంభించాడు. దీని తర్వాత కాంబ్లీ వంటగదికి పరిగెత్తాడు అక్క‌డ వంట పాన్ యొక్క హ్యాండిల్‌ను తీసుకొని అతని భార్యపై విసిరాడు. పోలీసులు రాకముందే వినోద్ కాంబ్లీ భార్య భాభా ఆసుపత్రిలో చికిత్స పొందిందని బాంద్రా పోలీసు అధికారి తెలిపారు. దీంతో కాంబ్లీపై ఐపీసీ సెక్షన్ 324(ప్రమాదకరమైన ఆయుధాలతో దాడిచేయడం) కింద కేసు నమోదు చేసినట్టు చెప్పారు.

ఇదిలా ఉంటే.. 51 ఏళ్ల వినోద్ కాంబ్లీకి వివాదాలు ఏమీ కొత్త కాదు. కొంతకాలం క్రితం అతను ఒక ఇంటర్వ్యూలో ఉద్యోగం గురించి మాట్లాడాడు. తనకు ఎలాంటి పని లేదని, బీసీసీఐ ఇచ్చే పెన్షన్‌పైనే జీవిస్తున్నానని కాంబ్లీ చెప్పాడు. గత కొంతకాలం క్రితం మద్యం తాగి వాహనం నడిపి వివాదంలో చిక్కుకున్నాడు.

టీమ్ఇండియా త‌రుపున వినోద్ కాంబ్లీ 17 టెస్టులు, 104 వ‌న్డేలు ఆడాడు.