మళ్లీ గర్జించాడు.. ప్రపంచ కప్‌కు ముందు అన్ని జ‌ట్ల‌కు ట్రైలర్ చూపించాడు..!

వైభవ్ సూర్యవంశీ ICC అండర్-19 వరల్డ్ కప్ 2026కి ముందు మరో అద్భుతమైన ఇన్నింగ్స్ ఆడడం ద్వారా అన్ని జట్లకు ట్రైలర్‌ను చూపించాడు. శనివారం బులవాయో అథ్లెటిక్ క్లబ్‌లో స్కాట్లాండ్ అండర్-19 జ‌ట్టుపై అతడు 50 బంతుల్లో 96 పరుగులతో విధ్వంస‌క‌ర‌ ఇన్నింగ్స్ ఆడాడు. వైభ‌వ్ ఇన్నింగ్స్‌లో 9 ఫోర్లు, 7 సిక్సర్లు ఉన్నాయి.

కెప్టెన్ ఆయుష్ మ్హత్రే (19 బంతుల్లో 22 పరుగులు)తో కలిసి సూర్యవంశీ తొలి వికెట్‌కు 42 బంతుల్లో 70 పరుగుల భాగస్వామ్యాన్ని నెలకొల్పాడు. తర్వాత ఆరోన్ జార్జ్ (58 బంతుల్లో 61 పరుగులు)తో కలిసి 56 బంతుల్లో 78 పరుగుల భాగస్వామ్యం నెలకొల్పాడు. సూర్యవంశీ కేవలం 27 బంతుల్లోనే అర్ధ సెంచరీ పూర్తి చేసుకున్నాడు. సిక్సర్ కొట్టి యాభై పూర్తి చేశాడు. అయితే వైభవ్ సెంచరీ చేయడంలో విఫ‌ల‌మ‌య్యాడు. అతడిని 96 పరుగుల వద్ద మను సరస్వత్ అవుట్ చేశాడు.

సూర్యవంశీ సారథ్యంలోని భారత జట్టు ఇటీవల యూత్ వన్డేలో దక్షిణాఫ్రికా అండర్-19 జట్టును 3-0తో ఓడించింది. ఈ సిరీస్‌లో అత్యధిక పరుగులు చేసిన బ్యాట్స్‌మెన్‌గా వైభవ్ నిలిచాడు. అతడు 68.66 సగటుతో, 187.27 స్ట్రైక్ రేట్‌తో 206 పరుగులు చేశాడు. ఇందులో ఒక సెంచరీ, ఒక అర్ధ సెంచరీ ఉన్నాయి. చివరి వన్డేలో వైభవ్ 74 బంతుల్లో 9 ఫోర్లు, పది సిక్సర్ల సాయంతో 127 పరుగులు చేశాడు.

ఈరోజు స్కాట్లాండ్‌తో జరిగిన వార్మప్ మ్యాచ్‌లో భారత్ 374/8 భారీ స్కోరును నమోదు చేసింది. విహాన్ మల్హోత్రా 81 బంతుల్లో 77 పరుగులు, అభిజ్ఞాన్ కుందు 48 బంతుల్లో 55 పరుగులు అందించారు. ఒల్లీ జోన్స్ పది ఓవర్లలో 70 పరుగులిచ్చి 4 వికెట్లు పడగొట్టాడు. అండర్-19 ప్రపంచకప్‌లో భారత్ తన తొలి మ్యాచ్‌ను జనవరి 15న బులవాయోలోని క్వీన్స్ స్పోర్ట్స్ క్లబ్‌లో అమెరికాతో ఆడనుంది. బంగ్లాదేశ్, న్యూజిలాండ్, అమెరికాలతో పాటు భారత జట్టు గ్రూప్-ఎలో చోటు దక్కించుకుంది. అండర్-19 ప్రపంచకప్ చరిత్రలో ఐదు టైటిల్స్ గెలిచిన భారత్ అత్యంత విజయవంతమైన జట్టుగా నిలిచింది.