అండ‌ర్‌-19 మహిళల టీ20 ప్రపంచకప్‌లో సంచ‌ల‌నం.. సెంచ‌రీ బాదిన తెలంగాణ అమ్మాయి

అండ‌ర్‌-19 మహిళల టీ20 ప్రపంచకప్‌లో భారత్, స్కాట్లాండ్ మధ్య జరిగిన మ్యాచ్‌లో టీమిండియా క్రీడాకారిణి గొంగడి త్రిష అద్భుత ప్రదర్శన చేసింది. ఈ మ్యాచ్‌లో స్కాట్లాండ్ బౌలర్లను చిత్తుచేసి గొంగడి త్రిష సెంచరీ చేసింది. దీంతో అండర్-19 మహిళల టీ20 ప్రపంచకప్‌లో గొంగడి త్రిష చరిత్ర సృష్టించింది.

అండర్-19 మహిళల T20 ప్రపంచ కప్ మొదటి ఎడిషన్ 2023 సంవత్సరంలో జ‌రిగింది. అయితే ఆ సమయంలో ఏ బ్యాట్స్‌మెన్ కూడా సెంచరీ చేయలేదు. ఇప్పుడు రెండో ఎడిషన్‌లో భారత క్రీడాకారిణి గొంగడి త్రిష సెంచరీ చేసి చరిత్ర సృష్టించింది. గొంగడి త్రిష 53 బంతుల్లో సెంచరీ పూర్తి చేసింది. త్రిష ఇన్నింగ్సులో 12 ఫోర్లు, 4 అద్భుతమైన సిక్సర్లు ఉన్నాయి. దీంతోపాటు ఐసీసీ అండర్-19 మహిళల టీ20 ప్రపంచకప్‌లో అత్యధిక స్కోరు సాధించిన తొలి క్రీడాకారిణిగా కూడా గొంగడి నిలిచాడు.

త్రిష 59 బంతుల్లో 13 ఫోర్లు, నాలుగు సిక్సర్ల సాయంతో 110 పరుగులు చేసి నాటౌట్‌గా నిలిచింది. ఆమె ఇన్నింగ్స్‌తో భారత్ 20 ఓవ‌ర్ల‌లో ఒక వికెట్ కోల్పోయి 208 పరుగుల భారీ స్కోరు సాధించింది. 42 బంతుల్లో 9 ఫోర్ల సాయంతో 51 పరుగులు చేసిన కమలినితో కలిసి త్రిష తొలి వికెట్‌కు 147 పరుగుల భారీ భాగస్వామ్యాన్ని నెలకొల్పింది.

19 ఏళ్ల త్రిష అండర్-19 మహిళల ఆసియా కప్‌లో భారత్‌ తరఫున స్టార్ పెర్ఫార్మర్‌గా నిలిచింది. ఐదు మ్యాచ్‌ల్లో త్రిష 53 సగటు, 120.45 స్ట్రైక్ రేట్‌తో 159 పరుగులు చేసి టాప్ స్కోర‌ర్‌గా నిలిచింది. గొంగడి త్రిష స్వ‌స్థ‌లం తెలంగాణ రాష్ట్రం భ‌ద్రాచలం.