IND vs NZ : తొలి టీ20కి ముందు ఇబ్బందుల్లో రింకూ సింగ్..!

భారత క్రికెట్ జట్టు సభ్యుడు, క్రికెటర్ రింకూ సింగ్ ఇంటర్నెట్ మీడియాలో చేసిన పోస్ట్‌పై వివాదం మొదలైంది. అత‌డిపై చర్యలు తీసుకోవాలని కోరుతూ కర్ణి సేన అధికారులు అలీఘర్‌లోని సస్ని గేట్ పోలీస్ స్టేషన్‌లో ఫిర్యాదు చేశారు. ఆర్టిఫిషియల్ ఇంటెలిజెన్స్ (ఏఐ) ద్వారా రూపొందించిన దేవుళ్లు, దేవతల వీడియోను రింకూ సింగ్ ఇంటర్నెట్ మీడియాలో పోస్ట్ చేశాడు. అందులో మైదానంలో రింకూ సింగ్ నిరంతరం సిక్స్‌లు కొడుతున్నట్లు చూపించారు. మీకు విజయాన్ని అందించింది ఎవరు అని రాయ‌గా.. దానికి సమాధానంగా దేవుడు సక్సెస్ ఇచ్చాడని ఈ వీడియోలో చూపించారు.

అందులో హనుమంతుడు ముదురు గాజులు ధరించి కారు నడుపుతున్నట్లు చూపించారు. శివుడు నల్ల గాజులు ధరించి ఆయ‌న ప‌క్క‌న‌ కూర్చున్నట్లు, వారి వెనుక ఇతర హిందూ దేవుళ్లు నల్ల కళ్లద్దాలు ధరించి కారులో కూర్చుని ఇంగ్లీష్ పాటను ప్లే చేస్తున్నట్టు రింకూ సింగ్ చేసిన పోస్టులో ఉంద‌ని కర్ణి సేన జిల్లా అధ్యక్షుడు సుమిత్ తోమర్ ఫిర్యాదులో పేర్కొన్నారు. దీని వ‌ల్ల‌ ప్రజల మనోభావాలు దెబ్బతింటున్నాయి. పోలీసులు చర్యలు తీసుకోవాలని డిమాండ్ చేశారు. ఈ విష‌య‌మై విచారణ జరుపుతున్నట్లు పోలీస్‌స్టేషన్‌ ఇన్‌చార్జి మనోజ్‌కుమార్‌ తెలిపారు. విచారణలో వెల్లడైన వాస్తవాల ఆధారంగా చర్యలు తీసుకుంటామన్నారు.

ఇక క్రికెట్ ఫీల్డ్ విషయానికొస్తే.. న్యూజిలాండ్‌తో బుధవారం నుంచి ప్రారంభం కానున్న ఐదు మ్యాచ్‌ల టీ20 సిరీస్ కోసం రింకూ సింగ్ బిజీగా ఉన్నాడు. ఈ సిరీస్‌కు రింకు జ‌ట్టులోకి ఎంపిక‌య్యాడు. ఈ సిరీస్‌లో తొలి మ్యాచ్‌ నాగ్‌పూర్‌లో జరగనుంది. దీని తర్వాత ఫిబ్రవరి 7 నుంచి ప్రారంభం కానున్న టీ20 ప్రపంచకప్‌కు రింకూ సన్నాహాలు ప్రారంభించనున్నాడు. మార్చి 8 వరకు భారత్, శ్రీలంక సంయుక్తంగా ఈ ప్రపంచకప్‌కు ఆతిథ్య‌మివ్వ‌నున్నాయి.