Video : క‌ళ్లు చెదిరే క్యాచ్ ప‌ట్టిన కమిన్స్..!

గ్రెనడాలోని సెయింట్ జార్జెస్‌లోని నేషనల్ క్రికెట్ స్టేడియంలో ఆస్ట్రేలియా, వెస్టిండీస్ మధ్య టెస్ట్ మ్యాచ్ జరుగుతోంది. ఈ మ్యాచ్ రెండో రోజు ఆస్ట్రేలియా కెప్టెన్ పాట్ కమిన్స్ ఆశ్చర్యకరమైన క్యాచ్ పట్టాడు. తను బౌల్ చేసిన‌ బంతిని బ్యాట్స్‌మెన్ డిపెన్స్ ఆడ‌గా బంతి పైకి లేచింది.. ఆ బంతిని గాలిలో అద్భుతంగా డైవ్ చేసి క్యాచ్ ప‌ట్టాడు. ఇలాంటి క్యాచ్‌లు పట్టడం ఫాస్ట్ బౌలర్‌కు అంత ఈజీ కాదు. కమిన్స్ పట్టుకున్న ఈ క్యాచ్ వీడియో సోష‌ల్ మీడియాలో తెగ వైర‌ల్ అవుతుంది.

వెస్టిండీస్ ఇన్నింగ్స్ 9వ ఓవర్ పాట్ కమిన్స్ బౌలింగ్ చేశాడు. ఆ ఓవర్ రెండో బంతికి కేసీ కార్తీ క్యాచ్ ఇచ్చి ఔట్ అయ్యాడు. ఆ ఓవర్ రెండో బంతిని కమిన్స్ ఆన్ లెంగ్త్ బౌలింగ్ చేశాడు. బంతి బ్యాట్ అంచుకు తగిలి స్క్వేర్ మిడ్-వికెట్ పొజిషన్ ముందు బౌన్స్ అయింది. బాల్ నో మ్యాన్స్ ల్యాండ్‌లో పడినట్లు కనిపించింది.. కానీ కమ్మిన్స్ తన కుడివైపుకి పరిగెత్తి, ముందుకు డైవ్ చేసి, ఆపై తన కుడిచేత్తో బంతిని నేల నుండి అంగుళాల దూరంలో పట్టుకున్నాడు. థర్డ్ అంపైర్ నితిన్ మీనన్ క్యాచ్‌ను తనిఖీ చేసి కేసీ కార్తీని ఔట్‌గా ప్రకటించాడు.

ఇక మ్యాచ్ గురించి చెప్పాలంటే రెండో రోజు ఆట ముగిసే వరకు ఆస్ట్రేలియా రెండో ఇన్నింగ్స్‌లో 2 వికెట్ల నష్టానికి 12 పరుగులు చేసింది. ఆస్ట్రేలియా 45 పరుగుల ఆధిక్యంలో ఉంది. తొలి రోజు ఆట ముగిసే సమయానికి ఆస్ట్రేలియా తొలి ఇన్నింగ్స్‌లో మొత్తం 10 వికెట్లు కోల్పోయి 286 పరుగులు చేసింది. బ్యూ వెబ్‌స్టర్, అలెక్స్ కారీ అర్ధ సెంచరీలు చేశారు. అల్జారీ జోసెఫ్ 4 వికెట్లు తన ఖాతాలో వేసుకున్నాడు.

రెండో రోజు ఆట ప్రారంభంలో వెస్టిండీస్ జట్టు బ్యాటింగ్‌కు దిగింది. బ్రాండన్ కింగ్ 75 పరుగుల ఇన్నింగ్స్ కారణంగా వెస్టిండీస్ తొలి ఇన్నింగ్స్‌లో 253 పరుగులు చేసింది. అతడికి తోడు జాన్ క్యాంప్‌బెల్ 40 పరుగులు చేశాడు. నాథన్ లియాన్ 3 వికెట్లు ప‌డ‌గొట్టాడు. అలాగే జోష్ హేజిల్‌వుడ్, పాట్ కమిన్స్ త‌లా 2-2 వికెట్లు తీశారు.