షాకింగ్ నిర్ణయం తీసుకున్న బాబర్

పాకిస్థాన్ స్టార్ ఆటగాడు బాబర్ ఆజం వైట్ బాల్ కెప్టెన్సీ నుంచి వైదొలగాలని నిర్ణయించుకున్నాడు. బాబర్ అక్టోబర్ 1న తాను కెప్టెన్సీని వదులుకోవాలని నిర్ణయించుకున్నట్లు తన నిర్ణయాన్ని అభిమానులకు వెల్లడించాడు. తన ప్రదర్శనకు ప్రాధాన్యత ఇవ్వాలని, కెప్టెన్సీ కారణంగా ఉండే అదనపు పనిభారాన్ని తగ్గించుకోవాలని అనుకున్నట్లు బాబర్ తెలిపాడు. ఈ నిర్ణయానికి సంబంధించి సోషల్ మీడియాలో క్రికెట్ అభిమానులలో ఒక వర్గం బాబర్‌ను ఎగతాళి చేస్తూ వస్తోంది. బాబర్ ఇంకా ICC ట్రోఫీని గెలవలేదని, అయితే పాకిస్తాన్ కెప్టెన్‌గా తన పదవికి ఇప్పటికే రెండుసార్లు రాజీనామా చేశాడని విమర్శించారు.

బాబర్ ఆజం కెప్టెన్ గా పాకిస్థాన్ జట్టు ఐసీసీ ఈవెంట్లలో ఘోరమైన ప్రదర్శన చేసింది. అతడి నాయకత్వంలో పాకిస్థాన్ వన్డే, టీ20 ప్రపంచకప్‌ల గ్రూప్‌ దశల్లోనే పరాజయం పాలైంది. మూడు ఫార్మాట్లలో బాబర్ ఫామ్ కూడా భారీగా పడిపోయింది. ఇక T20 క్రికెట్‌లో అతని బ్యాటింగ్ శైలికి ప్రపంచ వ్యాప్తంగా విమర్శలు వచ్చాయి. బాబర్ 2021 T20 ప్రపంచ కప్‌లో పాకిస్తాన్‌ను సెమీ-ఫైనల్‌కు నడిపించాడు. 2022 ఎడిషన్‌లో పాక్ రన్నరప్‌గా నిలిచింది.