'అది మా నిర్ణయం కాదు'.. పాక్ కెప్టెన్

టీ20 ప్రపంచ కప్‌లో భారత్‌తో ఆడకపోవడంపై పాకిస్థాన్ టీ20 కెప్టెన్ సల్మాన్ అలీ అఘా స్పందించాడు. పాకిస్తాన్ ప్రభుత్వం ఆదివారం తమ‌ జాతీయ జట్టు గ్లోబల్ టోర్నమెంట్‌లో పాల్గొంటుందని, అయితే ఫిబ్రవరి 15న భారత్‌తో జరిగే మ్యాచ్‌ను బహిష్కరిస్తుందని తెలిపింది. ఫిబ్రవరి 7 నుండి ప్రపంచ కప్ ప్రారంభం కానుంది. భారతదేశం-పాకిస్తాన్ ఒకే గ్రూప్‌లో ఉన్నాయి.

శ్రీలంకలోని కొలంబోలో భారత్, పాకిస్తాన్ మధ్య మ్యాచ్ జరగాల్సి ఉంది. అయితే, ఈ గ్రూప్ దశ మ్యాచ్‌ను బహిష్కరిస్తామని పాకిస్తాన్ ప్రభుత్వం స్పష్టం చేసింది. అదే సమయంలో భారత జట్టు ఐసిసి ప్రోటోకాల్‌ను అనుసరించాలని నిర్ణయించుకుంది. ఈ మ్యాచ్ కోసం శ్రీలంకకు వెళుతుంది. ఈ మ్యాచ్ కోసం భారత్ ప్రాక్టీస్ చేయడంతో పాటు విలేకరుల సమావేశం కూడా నిర్వహిస్తుందని వర్గాలు తెలిపాయి. టాస్ సమయంలో సూర్యకుమార్ యాదవ్ మైదానంలో ఉంటాడు. మ్యాచ్ రిఫరీ మ్యాచ్‌ను రద్దు చేసే వరకు జట్టు వేచి ఉంటుంది.

భారత్‌తో ఆడకూడదనే నిర్ణయం గురించి ఆఘా మాట్లాడుతూ.. ఆటగాళ్లు అలాంటి నిర్ణయాలు తీసుకోరని అన్నారు. పాకిస్తాన్ క్రికెట్ బోర్డు (PCB), పాకిస్తాన్ ప్రభుత్వం సూచనలను తాను పాటిస్తానని అన్నారు. "మేము ప్రపంచ కప్‌లో ఆడబోతున్నాం. ఇది మా నిర్ణయం కాదు. దాని గురించి మేము ఏమీ చేయలేము. మా ప్రభుత్వం, PCB చీఫ్ ఏమి చెప్పినా, మేము దానిని అనుసరిస్తాము" అని ఆస్ట్రేలియాతో జరిగిన మూడవ T20I తర్వాత ఆఘా అన్నారు. T20 ప్రపంచ కప్ కు ముందు ఆస్ట్రేలియాతో జరిగిన T20 సిరీస్ ను పాకిస్తాన్ 3-0 తేడాతో గెలుచుకుంది. పాకిస్తాన్ నిర్ణయం తీసుకున్నప్పటికీ, ICC వారి చర్యతో సంతోషంగా లేదు. పాకిస్తాన్ వైఖరిపై స్పందిస్తూ, పిసిబి ఇంకా అధికారికంగా దీని గురించి తమకు తెలియజేయలేదని ఐసిసి తెలిపింది.