T20 WC 2026 : హర్షిత్ రాణా స్థానాన్ని భర్తీ చేసే 'ప్రాణాంతక బౌలర్' ఎవ‌రంటే..?

2026 టీ20 ప్రపంచ కప్ కు ముందు భారత జట్టుకు పెద్ద ఎదురుదెబ్బ తగిలే అవ‌కాశం ఉంది. ఫాస్ట్ బౌలర్ హర్షిత్ రాణా గాయం కారణంగా టోర్నమెంట్ నుంచి తప్పుకునే అవకాశం ఉంది. అయితే అతని స్థానంలో భారత క్రికెట్ నియంత్రణ మండలి (BCCI) ఇతరులకు సమస్యగా మారగల మ‌రో బౌలర్‌ను జట్టులో చేర్చుకోవడానికి సన్నాహాలు చేస్తోంది. హర్షిత్ స్థానంలో మహమ్మద్ సిరాజ్‌ను టీమ్ ఇండియాలో చేర్చుకోవడానికి జట్టు యాజమాన్యం సన్నాహాలు చేస్తోందని వార్తా సంస్థ ANI వర్గాలను ఉటంకిస్తూ తెలిపింది.

దక్షిణాఫ్రికాతో జరిగిన వార్మప్ మ్యాచ్‌లో హర్షిత్ మోకాలి గాయంతో బాధపడ్డాడు. ఇప్పుడు టీ20 వ‌ర‌ల్డ్ క‌ప్‌ టోర్నమెంట్ నుండి దూరంగా ఉండే ప్రమాదం ఉంది. ఇదిలా ఉండగా.. భారత జట్టు కెప్టెన్ సూర్యకుమార్ యాదవ్ ప్రీ-మ్యాచ్ సమావేశంలో మాట్లాడుతూ.. "హర్షిత్ ఇంకా టోర్నమెంట్ నుండి తొలగించబడలేదు. ఫిజియోలు అతని గాయాన్ని అంచనా వేస్తున్నారు... అతను బాగాలేనట్లు కనిపిస్తోంది.. ఈరోజు నాటికి మనకు తెలుస్తుంది" అని అన్నారు.

హర్షిత్ దూరం అయితే జట్టు మేనేజ్‌మెంట్ వ్యూహం ఏమిటో సూర్యకుమార్ వివరించారు. "గత 1-2 సంవత్సరాలుగా బాగా రాణించిన ఫాస్ట్ బౌలర్లను లేదా బ్యాటింగ్ కూడా చేయగల బౌలర్లను మేము పరిశీలిస్తాము. మేము 9వ నంబర్ ఆటగాడి నుండి పెద్ద షాట్లు వస్తాయని ఆశిస్తున్నట్లయితే, టాప్ ఎనిమిది మంది ఏం చేస్తున్నారు? మేము ఉత్తమ ఆటగాడిని ఎంచుకోవడానికి ప్రయత్నిస్తామని పేర్కొన్నాడు.

ఇప్పుడు, మహమ్మద్ సిరాజ్ 2026 T20 ప్రపంచ కప్ కోసం భారత జట్టులో చేర్చబడతాడ‌ని వార్తలు వెలువడ్డాయి. అతడు గతంలో 2024 ప్రపంచ కప్ కోసం ఎంపిక చేసిన జట్టులో ఉన్నాడు.. కానీ అతనికి అవకాశం రాలేదు. అయితే, బుమ్రాతో పాటు అతడు భారత ఫాస్ట్ బౌలింగ్ ఎటాక్‌లో భాగం కాగలడనే ఆశ ఇప్పుడు ఉంది. సిరాజ్ చివరిసారిగా జూలై 30, 2024న శ్రీలంకపై T20I ఆడాడు. అప్పటి నుండి అతను T20I జట్టులో స్థానం ద‌క్కించుకోలేదు.