ఐపీఎల్ 2026కు ధోనీ దూరం.. సీఎస్కేకు భారీ షాక్!

ఇండియన్ ప్రీమియర్ లీగ్ (IPL) 2026 సీజన్ ప్రారంభానికి ముందే చెన్నై సూపర్ కింగ్స్ జట్టుకు గట్టి ఎదురుదెబ్బ తగిలింది. పిక్క కండరాల గాయం (Calf Strain) కారణంగా లెజెండరీ వికెట్ కీపర్ బ్యాటర్ ఎం.ఎస్ ధోనీ మొదటి రెండు వారాల పాటు ఆటకు దూరమయ్యాడు. ఈ విషయాన్ని శనివారం (మార్చి 28) ఫ్రాంచైజీ అధికారికంగా ధృవీకరించింది. 44 ఏళ్ల ధోనీ కోలుకోవడానికి సమయం పట్టనుండటంతో, సీజన్ ఆరంభంలో కనీసం నాలుగు కీలక మ్యాచ్‌లకు ఆయన అందుబాటులో ఉండరు.

ధోనీ లేని తొలి నాలుగు మ్యాచ్‌లు:

ధోనీ గాయం కారణంగా కింది మ్యాచ్‌లకు దూరం కానున్నారు:

మార్చి 30: రాజస్థాన్ రాయల్స్ vs చెన్నై సూపర్ కింగ్స్ (గువహటి)

ఏప్రిల్ 3: చెన్నై సూపర్ కింగ్స్ vs పంజాబ్ కింగ్స్

ఏప్రిల్ 5: రాయల్ ఛాలెంజర్స్ బెంగళూరు vs చెన్నై సూపర్ కింగ్స్

ఏప్రిల్ 11: చెన్నై సూపర్ కింగ్స్ vs ఢిల్లీ క్యాపిటల్స్

కీపర్ ఎవరు?

ధోనీ లేని పక్షంలో వికెట్ కీపింగ్ బాధ్యతలను ఎవరు చేపడతారనేది ఇప్పుడు ఆసక్తికరంగా మారింది. రాజస్థాన్ రాయల్స్ నుండి రవీంద్ర జడేజా మరియు సామ్ కర్రన్‌లను ఇచ్చి ట్రేడ్ చేసుకున్న సంజూ శాంసన్, ఈ సీజన్‌లో సీఎస్కే తరపున ఓపెనింగ్‌తో పాటు వికెట్ కీపింగ్ బాధ్యతలు చేపట్టే అవకాశం ఉంది. ఇటీవలి టీ20 వరల్డ్ కప్‌లోనూ సంజూ కీపర్‌గా ఆకట్టుకున్నారు. జట్టు వద్ద 27 ఏళ్ల ఉర్విల్ పటేల్ రూపంలో మరో కీపింగ్ ఆప్షన్ ఉన్నప్పటికీ, అనుభవం దృష్ట్యా సంజూకే మొగ్గు చూపే అవకాశం ఉంది.

గతేడాది 14 మ్యాచ్‌ల్లో 135 స్ట్రైక్ రేట్‌తో 196 పరుగులు చేసిన ధోనీ, జట్టులో అత్యంత ప్రభావవంతమైన వ్యక్తి. ఒకవేళ ఆయన కోలుకుని తిరిగి మైదానంలోకి అడుగుపెడితే, ఐపీఎల్ చరిత్రలో ఆడిన అత్యంత పెద్ద వయస్కుడైన భారతీయ ఆటగాడిగా రికార్డు సృష్టిస్తారు. ధోనీ గైర్హాజరీలో రుతురాజ్ గైక్వాడ్ నాయకత్వంలోని సీఎస్కే ఏ విధంగా రాణిస్తుందో చూడాలి. మార్చి 30న గువహటి వేదికగా రాజస్థాన్ రాయల్స్‌తో సీఎస్కే తన తొలి పోరును ప్రారంభించనుంది.