బెంగ‌ళూరు ఢ‌మాల్‌.. కోల్‌కతా ధనాధన్‌ షో

భారత్‌లో జ‌రిగిన ఇండియన్ ప్రీమియ‌ర్ లీగ్‌(ఐపీఎల్)14వ సీజ‌న్ తొలి అంచె పోటీల్లో చ‌క్క‌టి ప్ర‌ద‌ర్శ‌న క‌న‌బ‌రిచింది రాయల్‌ చాలెంజర్స్‌ బెంగళూరు జ‌ట్టు. పాయింట్ల ప‌ట్టిక‌లో మూడో స్థానంలో నిలిచింది. అయితే.. యూఏఈలో ప్రారంభ‌మైన రెండో అంచె పోటీల్లో మాత్రం ఆ జ‌ట్టు త‌డ‌బ‌డింది. కోహ్లీ, డివిలియ‌ర్స్‌, మాక్స్‌వెల్ వంటి స్టార్ హిట్ట‌ర్లు ఉన్నా.. క‌నీసం వంద ప‌రుగులు కూడా చేయ‌లేక ఘోర ప‌రాభ‌వం చ‌విచూసింది. సోమ‌వారం కోల్‌క‌తా నైట్‌రైడ‌ర్స్ చేతిలో 9 వికెట్ల తేడాతో ఓట‌మి పాలైంది.

టాస్ గెలిచిన కోహ్లీ మ‌రో ఆలోచ‌నే లేకుండా బ్యాటింగ్ ఎంచుకున్నాడు. స్టార్ హిట్ట‌ర్లు ఉండ‌డంతో.. ప‌రుగుల విందే అని అనుకున్నారంతా. అయితే.. రెండో ఓవర్లోనే కోహ్లి (5) ఔటయ్యాడు. పవర్‌ప్లేలో పడిక్కల్‌ పెవిలియన్‌(22) చేరాడు. 6 ఓవర్లు ముగిసేసరికి బెంగళూరు 41/2 స్కోరుతో నిలిచింది. ఏబీడీ, మాక్స్‌వెల్ ఉండ‌డంతో.. క‌నీసం 150 ప‌రుగులైనా చేస్తుంద‌ని అభిమానులు బావించారు. అయితే.. కోల్‌క‌తా బౌల‌ర్లు ర‌సెల్‌(3/9), వ‌రుణ్ చ‌క్ర‌వ‌ర్తి (3/13) మ్యాచ్ స్వ‌రూపాన్నే మార్చేశారు. ఏ ఒక్క బ్యాట్స్ మెన్‌ను కుదురుకోనివ్వ‌లేదు. వీరి ధాటికి.. భరత్‌ (16), డివిలియర్స్‌ (0), మ్యాక్స్‌వెల్‌ (10), హసరంగ (0) ఇలా వ‌చ్చి అలా వెళ్లిపోయారు. ఇక ఏ ద‌శ‌లోనూ బెంగ‌ళూరు కోలుకోలేదు. చివ‌రికి 19 ఓవ‌ర్ల‌లో 92 ప‌రుగుల‌కే ఆలౌట్ అయ్యింది.

స్వ‌ల్ప ల‌క్ష్యాన్ని కోల్‌క‌తా 10 ఓవర్లలో వికెట్‌ మాత్రమే కోల్పోయి చేదించింది. ఓపెనర్లు శుబ్‌మన్‌ గిల్‌ (34 బంతుల్లో 48; 6 ఫోర్లు, 1 సిక్స్‌), వెంకటేశ్‌ అయ్యర్‌ (27 బంతుల్లో 41 నాటౌట్‌; 7 ఫోర్లు, 1 సిక్స్‌) చెలరేగి ఆడారు. అద్భుతంగా బౌలింగ్ చేసిన వరుణ్‌కు 'మ్యాన్‌ ఆఫ్‌ ద మ్యాచ్‌' అవార్డు ల‌భించింది.