ఎల్లో అలర్ట్ ప్ర‌క‌టించిన వాతావరణ శాఖ‌.. మ్యాచ్ జ‌రుగుతుందా..?

గురువారం ఈడెన్ గార్డెన్స్‌లో కోల్‌కతా నైట్ రైడర్స్, లక్నో సూపర్ జెయింట్స్ మధ్య మ్యాచ్ జరగనుంది. అయితే వాతావరణం దృష్ట్యా మ్యాచ్ పూర్తవుతుందా లేదా అనే ఉత్కంఠ నెలకొంది. వాస్తవానికి, కోల్‌కతాలో 'ఎల్లో అలర్ట్' ఉంది. ఉదయం భారీ వర్షం కురిసింది. కోల్‌కతాలో వ‌ర్షం కురిసే అవకాశం ఉంది, దీని కారణంగా ఎల్లో అల‌ర్ట్‌ హెచ్చరిక జారీ చేయబడింది. అయితే మ్యాచ్ సమయానికి పరిస్థితులు బాగానే ఉంటాయని, అభిమానులు పూర్తి యాక్షన్‌ని చూడవచ్చని వార్తలు వస్తున్నాయి.

టాస్ సమయానికి వర్షం ఆగిపోతుందని అక్యూవెదర్ సూచించింది. మ్యాచ్ జరిగే సమయంలో ఆకాశం మేఘావృతమై ఉండే అవకాశం ఉంది. నిపుణులను విశ్వసిస్తే.. 40 ఓవర్ల మ్యాచ్ మొత్తం చూడవచ్చు. మ్యాచ్ సమయంలో ఉష్ణోగ్రత 24 నుండి 27 డిగ్రీల సెల్సియస్ మధ్య ఉండవచ్చని అంచనా. ఇక్కడ గంటకు 11 కి.మీ వేగంతో గాలి వీస్తుంది. అంటే ఫాస్ట్ బౌలర్లు ప్రారంభంలోనే ప్రయోజనం పొందవచ్చు. పిచ్‌పై తేమ 79 శాతం వరకు ఉంటుందని అంచనా. అంటే ఈడెన్ గార్డెన్స్ లో సాయంత్రం పూట మంచు కురుస్తుంది.

మ్యాచ్ సమయానికి వర్షం కురిసే అవకాశం లేకున్నా.. ఉదయం కురిసిన వర్షం కారణంగా మైదానంలోని ఔట్ ఫీల్డ్ ఎండిపోవడం కష్టం. మైదానం సిబ్బందికి ఆట పరిస్థితులను మెరుగుపరచడానికి సమయం పట్టవచ్చు, దీని ఫలితంగా మ్యాచ్ ప్రారంభంలో ఆలస్యం కావచ్చు. భారీ వర్షం, ఉరుములు, మెరుపులతో కూడిన ఈదురు గాలులు వచ్చే సూచనలు కనిపించినప్పుడు ఎల్లో అలర్ట్‌ జారీ చేస్తారు.