బౌలర్లలో నంబర్ వన్ బుమ్రా, ఆల్ రౌండర్లలో టాప్‌ జడేజా.. ఎక్కడో ఉన్న రోహిత్‌, కోహ్లీ..!

ఐసీసీ బుధవారం తాజా ర్యాంకింగ్స్‌ను విడుదల చేసింది. ఇందులో భారత ఫాస్ట్ బౌలర్ జస్ప్రీత్ బుమ్రా నంబర్ వన్ బౌలర్‌గా కొనసాగుతున్నాడు. ఆల్ రౌండర్ల విభాగంలో రవీంద్ర జడేజా తన అగ్రస్థానాన్ని నిలబెట్టుకున్నాడు. జనవరిలో ఆస్ట్రేలియాతో జరిగిన ఐదో, చివరి బోర్డర్-గవాస్కర్ టెస్టుకు ముందు బుమ్రా 907 పాయింట్ల‌తో చరిత్ర సృష్టించాడు. ఇది భారత బౌలర్‌కు ఐసీసీ అత్యధిక ర్యాంకింగ్ రేటింగ్. ప్రస్తుతం అతని రేటింగ్ 908. ఇది అతని ఉత్తమ రేటింగ్.

టెస్టు బౌలర్లలో ఆస్ట్రేలియాకు చెందిన పాట్ కమిన్స్ 841 రేటింగ్ పాయింట్లతో రెండో స్థానంలో, దక్షిణాఫ్రికాకు చెందిన కగిసో రబాడ 837 రేటింగ్ పాయింట్లతో మూడో స్థానంలో ఉన్నారు. ఆస్ట్రేలియాకు చెందిన జోష్ హేజిల్‌వుడ్ నాలుగో స్థానంలో, దక్షిణాఫ్రికాకు చెందిన మార్కో జాన్సెన్ ఐదో స్థానంలో ఉన్నారు. ముల్తాన్‌లో వెస్టిండీస్‌తో జరుగుతున్న తొలి టెస్టులో ఆరు వికెట్లు పడగొట్టిన‌ పాకిస్థాన్ ఆటగాడు నోమన్ అలీ(761) టాప్ 10లో చేరాడు. అలీ రెండు స్థానాలు ఎగబాకి తొమ్మిదో స్థానంలో ఉన్నాడు. బౌలర్లలో జాబితాలో భారత ఆటగాడు రవీంద్ర జడేజా 10వ స్థానంలో ఉన్నాడు.

టెస్టు ఫార్మాట్‌లో టాప్ 10 ఆల్‌రౌండర్ల జాబితాలో పెద్దగా మార్పు లేదు. 400 రేటింగ్ పాయింట్లతో జడేజా అగ్రస్థానంలో కొనసాగుతున్నాడు. అతని తర్వాతి స్థానంలో దక్షిణాఫ్రికాకు చెందిన మార్కో జాన్సెన్ ఉన్నాడు. అతని రేటింగ్ పాయింట్లు 294. బంగ్లాదేశ్‌కు చెందిన మెహదీ హసన్ 284 రేటింగ్ పాయింట్లతో మూడో స్థానంలో ఉన్నాడు. ఆస్ట్రేలియా కెప్టెన్ పాట్ కమిన్స్ 282 రేటింగ్ పాయింట్లతో నాలుగో స్థానంలో, బంగ్లాదేశ్‌కు చెందిన షకీబ్ అల్ హసన్ 263 రేటింగ్ పాయింట్లతో ఆల్ రౌండర్లలో ఐదో స్థానంలో ఉన్నారు.

టెస్టు బ్యాట్స్‌మెన్‌ల‌లో ఇంగ్లండ్‌ ఆటగాడు జో రూట్‌ అగ్రస్థానంలో ఉన్నాడు. అతని రేటింగ్ పాయింట్లు 895. అదే సమయంలో 876 రేటింగ్ పాయింట్లతో ఇంగ్లండ్‌కు చెందిన హ్యారీ బ్రూక్ రెండో స్థానంలో ఉన్నాడు. న్యూజిలాండ్‌ ఆటగాడు కేన్‌ విలియమ్సన్‌ మూడో స్థానంలో నిలిచాడు. అతని రేటింగ్ పాయింట్లు 867. భారత బ్యాట్స్‌మెన్‌ యశస్వి జైస్వాల్ 847 రేటింగ్ పాయింట్లతో నాలుగో స్థానంలో ఉండగా, ఆస్ట్రేలియాకు చెందిన ట్రావిస్ హెడ్ 772 రేటింగ్ పాయింట్లతో ఐదో స్థానంలో ఉన్నారు. టెస్టు బ్యాట్స్‌మెన్‌లో టాప్ 10లో భారత్‌కు చెందిన ఇద్దరు ఆటగాళ్లు ఉన్నారు. యశస్వితో పాటు రిషబ్ పంత్ కూడా ఉన్నాడు. పంత్ ఒక స్థానాన్ని కోల్పోయాడు. 10వ స్థానానికి పడిపోయాడు. పేలవ ఫామ్‌లో ఉన్న విరాట్ కోహ్లీ 26వ స్థానంలో ఉండగా.. శుభ్‌మన్ గిల్ 22వ స్థానంలో ఉన్నాడు. టెస్టు బ్యాట్స్‌మెన్‌లో రోహిత్ శర్మ 43వ స్థానంలో ఉన్నాడు.