బుమ్రా వచ్చేస్తున్నాడోచ్

రాయల్ ఛాలెంజర్స్ బెంగళూరుతో జరిగే మ్యాచ్ కు ముందు ఫాస్ట్ బౌలర్ జస్ప్రీత్ బుమ్రా ముంబై ఇండియన్స్ జట్టులో చేరాడు. హై ప్రొఫైల్ మ్యాచ్ కు ఒక రోజు ముందు, ఏప్రిల్ 6 ఆదివారం నాడు ఫ్రాంచైజీ ఈ విషయాన్ని అభిమానులకు తెలియజేసింది. బుమ్రా శనివారం జట్టులోకి చేరాడని, ఇప్పటికే మ్యాచ్ ప్రణాళికల్లో భాగమయ్యాడని స్పోర్ట్స్ టుడేకు సంబంధిత వర్గాలు తెలిపాయి. ఆదివారం అంతా సవ్యంగా జరిగితే ముంబైలో రాయల్ ఛాలెంజర్స్ బెంగళూరుతో జరిగే మ్యాచ్ లో బుమ్రా ఆడే అవకాశం ఉంది.

బోర్డర్-గవాస్కర్ ట్రోఫీ చివరి టెస్ట్ మ్యాచ్ తర్వాత బుమ్రా మరే మ్యాచ్‌లోనూ ఆడలేదు, ఆ మ్యాచ్‌లో వెన్ను గాయం కారణంగా అతను మ్యాచ్‌ ను మధ్యలో వదిలేయాల్సి వచ్చింది. ఆ తర్వాత ఇంగ్లాండ్‌తో జరిగిన వైట్ బాల్ సిరీస్‌తో పాటు 2025 ఛాంపియన్స్ ట్రోఫీకి కూడా బుమ్రా దూరమయ్యాడు. ఇండియన్ ప్రీమియర్ లీగ్‌లో ఇప్పటి వరకు తగినంతగా రాణించలేకపోయిన ముంబైకి బుమ్రా పునరాగమనం భారీ ఊరటనిస్తుంది. వారి స్టార్ పేసర్ లేకపోవడంతో, ముంబై తమ మొదటి నాలుగు మ్యాచ్‌లలో ఒక్క విజయం మాత్రమే లభించింది.