టెస్ట్ ర్యాంకింగ్స్‌లో తొలి స్థానంలో బుమ్రా.. రెండో స్థానంలోనూ ఇండియా బౌలర్

ఐసీసీ టెస్టు ర్యాంకింగ్స్‌లో భార‌త స్టార్ పేస‌ర్ జ‌స్ప్రీత్ బుమ్రా సత్తా చాటాడు. నెంబర్‌ వన్ స్థానం కైవ‌సం చేసుకున్నాడు. ఇటీవ‌ల ముగిసిన బంగ్లాదేశ్ టెస్టు సిరీస్‌లో అద్భుతంగా రాణించిన బుమ్రా ఏకంగా 870 రేటింగ్ పాయింట్ల‌తో మొదటి స్థానంలో నిలిచాడు. టీమిండియా స్పిన్ ఆల్‌రౌండ‌ర్ ర‌విచంద్ర‌న్ అశ్విన్‌ను వెన‌క్కి నెట్టి మ‌రీ బుమ్రా నంబ‌ర్‌వ‌న్‌ స్థానంలో నిలిచాడు.

కాగా.. అశ్విన్ 869 రేటింగ్ పాయింట్ల‌తో ఈ పాయింట్ల పట్టికలో రెండో స్థానంలో ఉన్నాడు. ర్యాంకింగ్స్‌లో ఇద్ద‌రు భార‌త బౌల‌ర్లు మొద‌టి రెండు స్థానాల్లో నిల‌వ‌డం విశేషంగా నిలిచింది. సొంతగడ్డపై బంగ్లాదేశ్‌పై రెండు టెస్టు మ్యాచ్‌ల సిరీస్ ను టీమిండియా కైవసం చేసుకుంది. రెండింట్లోనూ గెలిచింది. టెస్టు సిరీస్‌లో ఈ ఇద్ద‌రూ కూడా చెరో 11 వికెట్లు ప‌డ‌గొట్టారు. కానీ, బుమ్రా మంచి ఎకాన‌మీతో బౌలింగ్ చేయ‌డం అత‌నికి క‌లిసొచ్చింది. ఈ ఇద్ద‌రి త‌ర్వాత టాప్‌-5లో హేజిల్‌వుడ్‌, పాట్ క‌మిన్స్‌, క‌గిసో ర‌బాడ ఉన్నారు. అలాగే టీమిండియా మ‌రో ఆల్‌రౌండ‌ర్ ర‌వీంద్ర జ‌డేజా ఆరో స్థానంలో ఉన్నాడు.

మ‌రోవైపు ఈ ఏడాది సుదీర్ఘ ఫార్మాట్‌లో అత్య‌ధిక వికెట్లు తీసిన బౌల‌ర్ కూడా జస్ప్రీత్‌ బుమ్రానే ఉన్నాడు. 2024లో ఇప్ప‌టివ‌ర‌కు 7 టెస్టులు ఆడిన పేస‌ర్ ఏకంగా 38 వికెట్లు ప‌డగొట్టాడు. అటు శ్రీలంక స్పిన్న‌ర్ ప్ర‌భాత్ జ‌య‌సూర్య కూడా ఏడు టెస్టులే ఆడి 38 వికెట్లే తీశాడు. కానీ, బౌలింగ్ స‌గ‌టులో మాత్రం టీమిండియా బౌలర్ బుమ్రానే మెరుగ్గా ఉన్నాడు. ఇక టెస్టు బ్యాటింగ్ ర్యాంకింగ్స్‌లో జో రూట్, కేన్ విలియ‌మ్స‌న్, య‌శ‌స్వి జైస్వాల్ మొద‌టి మూడు స్థానాల్లో నిలిచారు. భార‌త యువ సంచ‌ల‌నం జైస్వాల్ రెండు స్థానాలు మెరుగుప‌ర‌చుకొని మూడో ర్యాంక్ ద‌క్కించుకోవ‌డం గ‌మ‌నార్హం.