IPL 2026 : ఆస్ట్రేలియా ఆటగాళ్లతో ఐపీఎల్ ఫ్రాంచైజీలకు ఇబ్బందులు.. భారీ నష్టం ఆ జట్టుకే..
ఐపీఎల్ 2026కు ముందు ఆస్ట్రేలియా ఫాస్ట్ బౌలర్లు కొంత ఇబ్బందిని సృష్టించారు.
By - Medi Samrat
ఐపీఎల్ 2026కు ముందు ఆస్ట్రేలియా ఫాస్ట్ బౌలర్లు కొంత ఇబ్బందిని సృష్టించారు. చెన్నై సూపర్ కింగ్స్ ఫాస్ట్ బౌలర్ నాథన్ ఎల్లిస్ గాయం కారణంగా రాబోయే సీజన్ నుండి తప్పుకున్నాడు. మిచెల్ స్టార్క్, పాట్ కమిన్స్, జోష్ హేజిల్వుడ్ తొలి కొన్ని మ్యాచ్లకు దూరంగా ఉండనున్నారు.
ఐపీఎల్ 2026 మార్చి 28న ప్రారంభమవుతుంది. క్రికెట్ ఆస్ట్రేలియా తమ ఫాస్ట్ బౌలర్ల విషయంలో ఎలాంటి రిస్క్ తీసుకోవడానికి సుముఖంగా లేదు. అందుకే వారి పునరాగమనం విషయంలో తొందరపడటం లేదు. ఆస్ట్రేలియాకు రాబోయే రోజుల్లో బిజీ షెడ్యూల్ ఉంది.. కాబట్టి కీలక ఆటగాళ్లు ఫిట్గా ఉండాలని కోరుకుంటోంది.
వచ్చే ఏడాది ఆస్ట్రేలియా, దక్షిణాఫ్రికా, భారత్, ఇంగ్లాండ్ పర్యటనలతో సహా సుమారు 21 టెస్ట్ మ్యాచ్లు ఆడనుంది. 2027లో తన వన్డే ప్రపంచ కప్ టైటిల్ను కాపాడుకోవాలని కూడా ఆస్ట్రేలియా యోచిస్తోంది. స్టార్క్, హేజిల్వుడ్, కమిన్స్లతో కూడిన ఆస్ట్రేలియా 'త్రయం' లభ్యత వారి పురోగతిపై ఆధారపడి ఉంటుంది.
ఆస్ట్రేలియా కెప్టెన్ పాట్ కమిన్స్ వెన్నునొప్పి కారణంగా గత ఏడాది యాషెస్ సిరీస్లో కేవలం ఒక టెస్టు మాత్రమే ఆడాడు. మరోవైపు, జోష్ హేజిల్వుడ్ తొడ కండరాల, చీలమండ గాయాల కారణంగా మొత్తం సిరీస్కు దూరమయ్యాడు. తదనంతరం అతను టీ20 ప్రపంచ కప్కు కూడా దూరమయ్యాడు.
మిచెల్ స్టార్క్ యాషెస్ సిరీస్లోని ఐదు టెస్టులూ ఆడాడు, కానీ టీ20 ఫార్మాట్ నుండి రిటైర్ అవ్వడం వల్ల టీ20 ప్రపంచకప్కు దూరమయ్యాడు. 36 ఏళ్ల స్టార్క్ గత 12 నెలల్లో టెస్ట్ క్రికెట్లో మహమ్మద్ సిరాజ్ తర్వాత రెండవ అత్యధిక బంతులు వేసిన బౌలర్.. అందుకే అతనిపై నిశితంగా నిఘా ఉంచారు. ఇదిలా ఉండగా, నాథన్ ఎల్లిస్ టీ20 ప్రపంచకప్ సమయంలో కుడి కాలి తొడ కండరాల గాయానికి గురై ఐపీఎల్ 2026కు దూరమయ్యాడు.
ఐపీఎల్ 2026లో ట్రావిస్ హెడ్, కామెరాన్ గ్రీన్, మార్కస్ స్టోయినిస్, టిమ్ డేవిడ్ వంటి ప్రముఖ పేర్లతో సహా 16 మంది ఆస్ట్రేలియా ఆటగాళ్లు పాల్గొంటున్నారు. పాట్ కమిన్స్ గైర్హాజరీలో ఇషాన్ కిషన్ జట్టుకు కెప్టెన్గా వ్యవహరిస్తాడని ఐపీఎల్ ఫ్రాంచైజీ సన్రైజర్స్ హైదరాబాద్ ఇటీవల ప్రకటించింది. అభిషేక్ శర్మ ఆరెంజ్ ఆర్మీకి వైస్ కెప్టెన్గా ఉంటాడు.
