భారత్‌తో ఆడకూడదనే పాక్‌ నిర్ణయంపై బీసీసీఐ రియాక్ష‌న్ ఇదే..!

టీ20 ప్రపంచ కప్‌లో భారత్‌తో గ్రూప్ దశ మ్యాచ్ ఆడేందుకు పాకిస్తాన్ నిరాకరించడంపై భారత క్రికెట్ నియంత్రణ బోర్డు (బీసీసీఐ) స్పందించింది. ఐసీసీ కూడా ఈ విషయంలో జోక్యం చేసుకుని పాకిస్తాన్ క్రికెట్ బోర్డు (పిసిబి) నుండి అధికారిక సమాచారం కోసం ఎదురు చూస్తున్నట్లు తెలిపింది. భారత్‌-పాకిస్తాన్ మధ్య మ్యాచ్ ఫిబ్రవరి 15న కొలంబోలో జరగనుంది.

శ్రీలంకలోని కొలంబోలో భారత్, పాకిస్తాన్ మధ్య మ్యాచ్ జరగాల్సి ఉంది. అయితే, ఈ గ్రూప్ దశ మ్యాచ్‌ను బహిష్కరిస్తామని పాకిస్తాన్ ప్రభుత్వం స్పష్టం చేసింది. అదే సమయంలో భారత జట్టు ఐసిసి ప్రోటోకాల్‌ను అనుసరించాలని నిర్ణయించుకుంది. ఈ మ్యాచ్ కోసం శ్రీలంకకు వెళుతుంది. ఈ మ్యాచ్ కోసం భారత్ ప్రాక్టీస్ చేయడంతో పాటు విలేకరుల సమావేశం కూడా నిర్వహిస్తుందని వర్గాలు తెలిపాయి. టాస్ సమయంలో సూర్యకుమార్ యాదవ్ మైదానంలో ఉంటాడు. రిఫరీ మ్యాచ్‌ను రద్దు చేసే వరకు జట్టు వేచి ఉంటుంది.

పాకిస్తాన్ నిర్ణయం గురించి బీసీసీఐ ఉపాధ్యక్షుడు రాజీవ్ శుక్లా మాట్లాడుతూ.. ఈ విషయంలో ఐసీసీ నుండి ఒక పెద్ద ప్రకటన వచ్చింది. "వారు క్రీడా స్ఫూర్తి గురించి మాట్లాడారు. ఈ విషయంపై మేము ICC నిర్ణ‌యంతో పూర్తిగా ఏకీభవిస్తాం. ICCతో మాట్లాడే వరకు BCCI ఈ విషయంపై వ్యాఖ్యానించదని స్ప‌ష్టం చేశారు.

ఇదిలావుంటే.. పాకిస్తాన్ ఆడ‌కూడ‌ద‌నే నిర్ణయం తీసుకున్నప్పటికీ.. ఐసీసీ ఈ నిర్ణ‌యం ప‌ట్ల‌ సంతోషంగా లేదు. పాకిస్తాన్ వైఖరిపై స్పందిస్తూ.. పీసీబీ ఈ విషయాన్ని ఇంకా అధికారికంగా తమకు తెలియజేయలేదని ఐసీసీ పేర్కొంది.