స్మార్ట్ మార్నింగ్ న్యూట్రిషన్ శక్తితో రోగనిరోధక శక్తిని బలోపేతం చేసుకోండి

వాతావరణం మారుతున్న కాలంలో సీజనల్ వైరల్ ఇన్ఫెక్షన్లు ఎక్కువగా ప్రబలుతుంటాయి. కాబట్టి ఈ సమయంలో మీ రోగనిరోధక వ్యవస్థను బలోపేతం చేసుకోవడం చాలా అవసరం. జలుబు, ఫ్లూ మరియు ఇతర శ్వాసకోశ వ్యాధులు ఇలాంటి పరిస్థితుల్లో వేగంగా వృద్ధి చెందుతాయి. కాబట్టి రోజు ప్రారంభం నుంచే పోషకాలతో కూడిన ఆహారంతో మీ శరీరానికి మద్దతు ఇవ్వడం వల్ల మంచి ఫలితం ఉంటుంది. ఉదయం పూట సరైన జీవనశైలి మీ రోగనిరోధక వ్యవస్థ సమర్థవంతంగా పనిచేయడానికి అవసరమైన ప్రాథమిక మద్దతును అందిస్తుంది. బాదం, గుడ్లు, సిట్రస్ పండ్లు, పులియబెట్టిన ఆహారాలు మరియు తృణధాన్యాలు వంటి వాటిని ఉదయం పూట తీసుకోవడం వల్ల శరీరానికి శక్తితో పాటు.. రోగనిరోధక పనితీరును మెరుగుపరిచే మరియు వాపును తగ్గించే కీలకమైన సూక్ష్మపోషకాలు అందుతాయి. మీ ఉదయం అల్పాహారంలో చేర్చుకోవాల్సిన నాలుగు సులభమైన ఎంపికలు ఇక్కడ ఉన్నాయి:

బాదం

విటమిన్ ఇ, మెగ్నీషియం, ప్రోటీన్, రిబోఫ్లావిన్ మరియు జింక్‌తో సహా 15 రకాల పోషకాలకు బాదం అద్భుతమైన మూలం. ఈ మూలకాలన్నీ యాంటీఆక్సిడెంట్ కార్యకలాపాలకు మరియు రోగనిరోధక కణాల పనితీరుకు మద్దతు ఇవ్వడానికి కలిసి పనిచేస్తాయి. వీటిని పోరిడ్జ్ (గంజి/జావ) లేదా పెరుగులో కలుపుకుని తినవచ్చు లేదా ఉదయం పూట పోషకమైన ప్రారంభం కోసం వాటిని అలాగే తినవచ్చు.

గుడ్లు

గుడ్లు అధిక-నాణ్యత గల ప్రోటీన్‌తో పాటు విటమిన్ డి మరియు ఇతర పోషకాలను అందిస్తాయి. ఇవి రోగనిరోధక శక్తి నియంత్రణకు, టీ-సెల్ పనితీరుకు మరియు అనేక ఇతర విధులకు కీలకమైనవి. ఆరోగ్యకరమైన బ్రేక్‌ఫాస్ట్ కోసం వీటిని ఉడకబెట్టి, పోచ్ చేసి లేదా స్క్రాంబుల్ చేసి బచ్చలికూర మరియు హోల్ వీట్ టోస్ట్‌తో కలిపి ఆస్వాదించండి.

సిట్రస్ పండ్లు

నారింజ, గ్రేప్‌ఫ్రూట్ మరియు బత్తాయిలలో విటమిన్ సి పుష్కలంగా ఉంటుంది. ఇది రోగనిరోధక వ్యవస్థకు మద్దతు ఇస్తుంది మరియు శక్తివంతమైన యాంటీఆక్సిడెంట్‌గా పనిచేస్తుంది. హానికరమైన సూక్ష్మజీవులపై పోరాడేందుకు ఈ పండ్లు మీ శరీరపు మొదటి రక్షణ శ్రేణిని బలోపేతం చేస్తాయి. వీటిని నేరుగా తినవచ్చు లేదా నీటిలో కలుపుకుని రిఫ్రెషింగ్ డ్రింక్ లాగా తాగవచ్చు. సిట్రస్ పండ్లతో పాటు, ఉసిరి మరియు జామకాయలలో కూడా విటమిన్ సి పుష్కలంగా ఉంటుంది. వీలున్నప్పుడల్లా వీటిని తినండి.

పులియబెట్టిన ఆహారాలు

ఆరోగ్యకరమైన గట్ మైక్రోబయోమ్ (పేగుల్లోని మంచి బ్యాక్టీరియా) రోగనిరోధక వ్యవస్థను బలోపేతం చేయడంలో మరియు ఇన్ఫెక్షన్లతో పోరాడే శరీర సామర్థ్యాన్ని మెరుగుపరచడంలో కీలక పాత్ర పోషిస్తుంది. పెరుగు, డోక్లా, ఇడ్లీ, దోశ, పులియబెట్టిన అన్నం (చద్దన్నం) మొదలైనవాటిని ఉదయం బ్రేక్‌ఫాస్ట్‌లో చేర్చుకోవడం వల్ల పేగులకు మేలు చేసే బ్యాక్టీరియా వృద్ధి చెందుతుంది.

మీ ఉదయం ఆహారంలో వీటికి ప్రాధాన్యత ఇవ్వడం వల్ల సీజనల్ వ్యాధులను తట్టుకునే రోగనిరోధక శక్తి పెరుగుతుంది. అయితే వీటిని క్రమం తప్పకుండా తీసుకోవడం ముఖ్యం. అలాగే, ఈ ఆహార ఎంపికలతో పాటు తగినంత నిద్ర, సమతుల్య ఆహారం మరియు శరీరానికి సరిపడా నీరు అందించడం ద్వారా మీ సంపూర్ణ ఆరోగ్యానికి మరింత ప్రయోజనం చేకూరుతుంది.

- షీలా కృష్ణస్వామి, న్యూట్రిషన్ అండ్ వెల్‌నెస్ కన్సల్టెంట్