అక్టోబర్ 1 నుంచి 5జీ సేవలు.. ఇంటర్నెట్ యూజర్లకు పండగే
PM Modi to launch 5G services at India Mobile Congress in Delhi on Oct 1. 5జీ సేవల కోసం ఎదురుచూస్తున్న వారికి శుభవార్త. అక్టోబర్ 1న ఢిల్లీలో జరిగే ఇండియా మొబైల్ కాంగ్రెస్‌లో
By అంజి Published on 27 Sep 2022 4:47 AM GMT
5జీ సేవల కోసం ఎదురుచూస్తున్న వారికి శుభవార్త. అక్టోబర్ 1న ఢిల్లీలో జరిగే ఇండియా మొబైల్ కాంగ్రెస్‌లో ప్రధాని నరేంద్ర మోదీ అధికారికంగా 5G సేవలను ప్రారంభించనున్నారు. రిలయన్స్ జియో, భారతీ ఎయిర్‌టెల్ ఈ సేవలను ప్రారంభించేందుకు సిద్ధంగా ఉండగా, వొడాఫోన్‌ ఐడియా ఈ సేవలను ప్రారంభించడానికి కొంత సమయం పట్టవచ్చు.
ఈ సేవలు తొలుత మెట్రో నగరాల్లో అందుబాటులోకి రానున్నాయి. అయితే ఈ 5జీ సేవలపై కొన్ని ప్రశ్నలు యూజర్లకు తలెత్తుతున్నాయి. వారి ఫోన్ 5G సేవలకు సపోర్ట్ ఇస్తుందా? ప్రస్తుత సిమ్ కార్డ్ పని చేస్తుందా? లేక కొత్తది తీసుకోవాలా? వంటి ప్రశ్నలు వినియోగదారుల మదిలో మెదులుతున్నాయి. 5G సేవలు ఎలా పనిచేస్తాయో తెలుసుకుందాం.
మీరు ఫోన్ యొక్క నెట్‌వర్క్ సెట్టింగ్‌లు లేదా SIM కార్డ్ యొక్క ప్రాధాన్య నెట్‌వర్క్‌ను చూడటం చేయడం ద్వారా ఫోన్ 5G సేవలకు సపోర్ట్ ఇస్తుందో లేదో చూడొచ్చు. ప్రాధాన్య నెట్‌వర్క్ 5Gని సూచిస్తే, ఫోన్ 5Gకి మద్దతు ఇస్తుంది. మీకు మొబైల్ నెట్‌వర్క్ సెట్టింగ్‌లలో 5G కనిపించకపోతే, అది 5Gకి సపోర్ట్ చేయదని అర్థం. అప్పుడు మీరు 5G సపోర్ట్ చేసే ఫోన్‌ను కొనుగోలు చేయాలి.
కొత్త 5G ఫోన్ కావాలా? వచ్చే నెలలో మెట్రో నగరాల్లోని వినియోగదారులకు మాత్రమే అందుబాటులోకి రానున్న 5జీ సేవలు వచ్చే ఏడాది నాటికి దేశంలోని అన్ని నగరాల్లోని వినియోగదారులకు అందుబాటులోకి వచ్చే అవకాశం ఉంది. మీరు ఢిల్లీ, ముంబై, కోల్‌కతా, చెన్నై, హైదరాబాద్, బెంగళూరులలో నివసిస్తున్నారా?.. అయితే వేగవంతమైన ఇంటర్నెట్ స్పీడ్‌ను అనుభవించడానికి మీరు తప్పనిసరిగా 5G ఫోన్‌ని కలిగి ఉండాలి.
అహ్మదాబాద్, లక్నో, చండీగఢ్, గురుగ్రామ్, విజయవాడ, విశాఖపట్నం, తిరుపతి వంటి ఇతర నగరాలు 5G కనెక్టివిటీని పొందడానికి మరికొన్ని రోజులు పట్టవచ్చు. దేశంలో తొలిసారిగా 5జీని ప్రారంభించనున్న 13 నగరాల పేర్లను టెలికాం శాఖ ఇప్పటికే ప్రకటించింది. టాప్ 100 నగరాల్లో ఇప్పటికే 5G కవరేజ్ ప్లానింగ్‌ను పూర్తి చేసినట్లు Jio ప్రకటించింది. 2024 నాటికి, దేశంలోని గ్రామీణ ప్రాంతాలతో సహా అన్ని నగరాలను కవర్ చేసే లక్ష్యంతో Airtel ముందుకు సాగుతోంది.
అన్ని మొబైల్ తయారీ కంపెనీలు ప్రస్తుతం 5G ఫోన్‌ల తయారీపై దృష్టి సారించాయి. కాగా Apple, Samsung, Xiaomi, Poco, Realme, Vivo ఇప్పటికే 5G ఫోన్లను విడుదల చేశాయి. వీటిలో కొన్ని బ్రాండ్లు రూ.15,000కే 5జీ ఫోన్లను అందిస్తున్నాయి. 10,000 రూపాయలకే 5G ఫోన్‌ను తీసుకురానున్నట్టు Realme ప్రకటించింది.
