'డ్రాగన్ ఫ్రూట్'కు పేరు మార్పు.. ఎందుకో తెలుసా?

చూడగానే నోరూరించే విధంగా ఎంతో ఎర్రగా ఉండే డ్రాగన్ ఫ్రూట్ ప్రస్తుతం పేరు మార్చుకోబోతుందని తెలుస్తోంది. ఈ పండును డ్రాగన్ ఫ్రూట్ అని పిలవడం వల్ల చైనాకు పర్యాయపదంగా వస్తుందని.. అందుకోసమే దీనికి పేరు మార్చాలని గుజరాత్ సీఎం తెలిపారు. చూడగానే ఎర్రటి రంగులో, తామర పువ్వును తలపించేలా ఉన్న ఈ పండుకు కమలంగా పేరు మార్చాలని తాజాగా నిర్ణయం తీసుకున్నట్లు రాష్ట్ర ప్రభుత్వం తెలియజేసింది.

గుజరాత్ సీఎం హార్టికల్చర్ డెవలప్మెంట్ మిషన్ ను ప్రారంభించిన అనంతరం ఈ విషయాన్ని తెలియజేశారు. డ్రాగన్ ఫ్రూట్ ను కమలం పండుగా పిలిచేందుకు పేటెంట్ కోసం దరఖాస్తు చేసుకున్నట్లు తెలియజేశారు. డ్రాగన్ అనే పేరు చైనాతో ముడిపడి ఉండటంవల్ల ఈ మేరకే ఈ పండు పేరును మార్చుతూ నిర్ణయం తీసుకున్నట్లు గుజరాత్ ముఖ్యమంత్రి తెలియజేశారు. ఈ పేరు మార్చడం వెనుక మరొక ఆసక్తికరమైన విషయం ఏమిటంటే బిజెపి పార్టీ గుర్తు కూడా కమలం కావడంతో ఈ పండుకు ఆ పేరును నిర్ణయించారు. అంతేకాకుండా గాంధీనగర్లోని గుజరాత్ బిజెపి ప్రధాన పార్టీ కార్యాలయానికి" శ్రీ కమలం"అనే పేరును కూడా పెట్టారు.

ఎన్నో పోషక విలువలతో కూడిన ఉష్ణ మండల ప్రాంతాలలో పెరిగే అమెరికాకు చెందిన ఈ పండును ప్రస్తుతం భారతదేశంలో వివిధ ప్రాంతాలలో కూడా సాగు చేస్తున్నారు. ఈ డ్రాగన్ ఫ్రూట్ భారతదేశంలో కిలో దాదాపు 350 నుంచి 500 రూపాయల వరకు విక్రయిస్తుంటారు. ఈ పండును తినటం వల్ల ఎన్నో రకాల క్యాన్సర్ల నుంచి విముక్తి పొందవచ్చు. ఆస్తమా, డయాబెటిక్ వంటి వ్యాధులతో బాధపడేవారికి ఈ ఫ్రూట్ ఎంతో ఉపయోగపడుతుంది.