అదృష్టం త‌లుపు త‌ట్టింది.. రూ.200 పెడితే.. ఏకంగా కోటిరూపాయ‌లు

అదృష్టం ఎవ‌రిని ఎప్పుడు ఎలా వ‌రిస్తుందో తెలీదు. అదృష్టం త‌లుపు త‌డితే రాత్రికి రాత్రే కోటీశ్వ‌రుడు కావ‌చ్చు. తాజాగా ఐపీఎల్(ఇండియ‌న్ ప్రీమియ‌ర్ లీగ్‌) ఓ ప్లంబ‌ర్ జీవితాన్నే మార్చేసింది. క్రికెట్ బెట్టింగ్ యాప్ అయిన డ్రీమ్‌-11లో అత‌డు కోటి రూపాయ‌లు గెలుచుకున్నాడు. బీహార్‌కు చెందిన ఓ వ్య‌క్తి అక్టోబ‌ర్ 10న చెన్నై సూప‌ర్‌కింగ్స్‌, ఢిల్లీ క్యాపిట‌ల్స్ మ‌ధ్య జ‌రిగిన క్వాలిఫ‌య‌ర్-1 మ్యాచ్‌పై బెట్ వేయ‌గా.. అదృష్టం క‌లిసి వ‌చ్చి కోటీశ్వ‌రుడు అయ్యాడు.

వివ‌రాల్లోకి వెళితే.. క‌టిహార్ జిల్లా మ‌నిహారీకి చెందిన బ‌బ్లూ మండ‌ల్ హంస్‌వ‌ర్ గ్రామంలో ప్లంబ‌ర్ ప‌నులు చేసేవాడు. అత‌డితో పాటు ప‌నిచేసే ఓ వ్య‌క్తి.. డ్రీమ్ 11 యాప్ గురించి చెప్పాడు. అప్ప‌టి వ‌రకు బ‌బ్లూ కు ఆ యాప్ గురించి తెలీదు. స‌ద‌రు వ్య‌క్తే ఆ యాప్‌ను బ‌బ్లూ ఫోన్‌లో ఇన్‌స్టాల్ చేశాడు. ఎలా ఆడాలో నేర్చించాడు. చాలా త‌క్కువ రోజుల్లోనే బ‌బ్లూకు అదృష్టం త‌లుపు త‌ట్టింది. ఈ న‌గ‌దుతో అప్పులు తీర్చి మంచి ఇల్లు క‌ట్టుకుంటాన‌ని, కొంత మొత్తాన్ని దేవాల‌యానికి విరాళంగా ఇస్తాన‌ని చెబుతున్నాడు.

'నాతో పని చేసే ఓ వ్య‌క్తి నాకు డ్రీమ్ 11 యాప్ గురించి చెప్పాడు. అప్ప‌టి వ‌ర‌కు దాని గురించి నాకు తెలీదు. అత‌డే నా ఫోన్‌లో ఆ యాప్‌ను ఇన్‌స్టాల్ చేశాడు. కొద్దిరోజులుగా నేను ఆ యాప్ వాడ‌డం మొద‌లుపెట్టా. ఫ‌స్ట్‌ రూ.200 పెట్టాను. ఏకంగా కోటీ రూపాయ‌లు వచ్చాయి. ప‌న్నుల రూపంలో రూ.30ల‌క్ష‌లు పోగా.. రూ.70ల‌క్ష‌లు వ‌చ్చాయి. అప్పులు తీర్చి మంచి ఇళ్లు క‌ట్టుకుంటా. దేవాల‌యానికి కొంత విరాళం ఇస్తా.. అని బ‌బ్లూ మీడియాతో చెప్పుకొచ్చాడు.