19 ఏళ్ల అమ్మాయిని బలవంతంగా ముద్దుపెట్టుకున్న జొమాటో డెలివరీ మ్యాన్

పూణేలోని యెవలేవాడి ప్రాంతంలో ఒక అమ్మాయిని డెలివరీ మ్యాన్ వేధించాడు. ఆమెకు ఆహారం డెలివరీ చేసిన తర్వాత బలవంతంగా ముద్దుపెట్టుకున్నందుకు 42 ఏళ్ల జొమాటో డెలివరీ వ్యక్తిని అరెస్టు చేసినట్లు పోలీసులు తెలిపారు. డెలివరీ చేసిన వ్యక్తిపై 19 ఏళ్ల యువతి పూణే నగర పోలీసులకు ఫిర్యాదు చేయడంతో అరెస్ట్ చేశారు. అతను ఫుడ్ డెలివరీ చేసిన తర్వాత తాగడానికి నీరు అడిగాడు.. ఆ తర్వాత అతను అమ్మాయిని వేధించాడని పేర్కొంది.

తనకు ఆహారం అందజేసిన తర్వాత డెలివరీ చేసిన వ్యక్తి తాగేందుకు నీళ్లు అడిగాడని బాలిక పోలీసులకు ఇచ్చిన ఫిర్యాదులో పేర్కొంది. తాను నీరు తెచ్చిన వెంటనే కుటుంబ సభ్యుల గురించి అడగడం ప్రారంభించాడు. ఆ సమయంలో తన ఇద్దరు స్నేహితులతో కలిసి తాను ఫ్లాట్‌లో నివసిస్తున్నానని.. వాళ్లు ఇళ్లకు వెళ్లారని బాలిక చెప్పగా.. బాలిక ఒంటరిగా ఉందని తెలుసుకున్న డెలివరీ మ్యాన్ వెంటనే బాలిక నుంచి మరో గ్లాసు నీళ్లు అడిగాడు. ఆ అమ్మాయి మరో గ్లాసు నీళ్ళు తీసుకోవడానికి వెనక్కి తిరిగింది, డెలివరీ చేసే వ్యక్తి ఆమెను వెనుక నుండి గట్టిగా పట్టుకుని, ఆమె చెంపపై రెండుసార్లు బలవంతంగా ముద్దు పెట్టుకున్నాడు. తర్వాత డెలివరీ మ్యాన్ నేను నీ మామయ్య లాంటివాడని, ఏదైనా సహాయం కావాలంటే తనతో అడగాలని చెప్పి అక్కడి నుండి వెళ్లిపోయాడు.

డెలివరీ మ్యాన్ ఆ తర్వాత తన వాట్సాప్ నంబర్‌కు మెసేజ్ చేయడం ప్రారంభించాడని అమ్మాయి పోలీసులకు తెలిపింది. ఈ సంఘటన సెప్టెంబర్ 17 రాత్రి 9:30 గంటల ప్రాంతంలో జరిగినట్లు సమాచారం. బాలిక ఇంజినీరింగ్ విద్యార్థిని, కోంద్వాలోని ఓ కళాశాలలో చదువుతోంది. మొదట ఫిర్యాదు చేయడానికి సంకోచించానని ఆమె తెలిపింది. కానీ అతను వాట్సాప్‌లో మెసేజ్ చేయడం ప్రారంభించినప్పుడు, ఆమె కోంద్వా పోలీస్ స్టేషన్‌లో కేసు నమోదు చేసింది. ఫిర్యాదు తర్వాత, జొమాటో డెలివరీ మ్యాన్‌ను అరెస్టు చేశారు. అయితే బెయిల్‌పై విడుదల చేశారు. ఈ విషయంపై సీనియర్ పోలీస్ ఇన్‌స్పెక్టర్ సర్దార్ పాటిల్ మాట్లాడుతూ, తదుపరి విచారణ ఇంకా కొనసాగుతోందని తెలిపారు.