'కేవలం వాట్సాప్ చాట్ ఆధారంగా విడాకులు ఇవ్వలేం'.. హైకోర్టు కీలక తీర్పు
నాసిక్ ఫ్యామిలీ కోర్టు మంజూరు చేసిన విడాకుల డిక్రీని బాంబే హైకోర్టు కొట్టివేసింది. భార్య వైపు వాదనలు వినకుండా, కేవలం భర్త...
By - అంజి
'కేవలం వాట్సాప్ చాట్ ఆధారంగా విడాకులు ఇవ్వలేం'.. హైకోర్టు కీలక తీర్పు
నాసిక్ ఫ్యామిలీ కోర్టు మంజూరు చేసిన విడాకుల డిక్రీని బాంబే హైకోర్టు కొట్టివేసింది. భార్య వైపు వాదనలు వినకుండా, కేవలం భర్త సమర్పించిన వాట్సాప్ చాట్ల ఆధారంగా ఆమె క్రూరంగా ప్రవర్తించిందని నిర్ధారించలేమని కోర్టు స్పష్టం చేసింది. అంతకుముందు, నాసిక్ ఫ్యామిలీ కోర్టు భర్త దాఖలు చేసిన విడాకుల పిటిషన్ను అంగీకరించింది. భార్యాభర్తల మధ్య జరిగిన వాట్సాప్, ఎస్ఎంఎస్ (SMS) సందేశాలను భర్త సాక్ష్యాలుగా చూపారు.
తనను పూణేకు మారిపోవాలని ఒత్తిడి చేయడం, తన తల్లిదండ్రులను దూషించడం వంటి చర్యల ద్వారా భార్య తనకు "మానసిక వేదన" కలిగించిందని భర్త వాదించారు. ఆ సాక్ష్యాలను పరిగణనలోకి తీసుకున్న నాసిక్ కోర్టు, భార్య వాదన వినకుండానే విడాకులు మంజూరు చేసింది. అయితే, ఈ తీర్పుతో బాంబే హైకోర్టు విభేదించింది. ఆ మెసేజ్ల వెనుక ఉన్న వాస్తవాలను వివరించే లేదా సవాలు చేసే అవకాశం భార్యకు ఇవ్వలేదని న్యాయమూర్తులు పేర్కొన్నారు.
కేవలం వాట్సాప్ చాట్ల ఆధారంగానే క్రూరత్వాన్ని నిర్ధారించలేమని కోర్టు స్పష్టం చేసింది. "భార్యకు తన సాక్ష్యాధారాలను సమర్పించే అవకాశం కల్పిస్తూ, ఈ కేసును తిరిగి ఫ్యామిలీ కోర్టుకు బదిలీ చేస్తున్నాం" అని తీర్పునిచ్చింది. డిజిటల్ సాక్ష్యాలను పరిగణనలోకి తీసుకోవచ్చు కానీ, ఇరుపక్షాల వాదనలు వినకుండా ఏకపక్షంగా నిర్ణయం తీసుకోకూడదని ఈ తీర్పు స్పష్టం చేస్తోంది.
