Video: బస్సులో బిడ్డకు జన్మనిచ్చిన మహిళ

కేరళలోని త్రిసూర్‌లో మలప్పురం జిల్లాకు చెందిన 37 ఏళ్ల మహిళ కేఎస్‌ఆర్‌టీసీ బస్సులో ఆడబిడ్డకు జన్మనిచ్చింది. బుధవారం నాడు త్రిస్సూర్ నుండి కోజికోడ్‌లోని తొట్టిల్‌పాలెంకు తన భర్తతో కలిసి ప్రయాణిస్తున్న మహిళకు బస్సు పెరమంగళం గ్రామం దాటగానే విపరీతమైన ప్రసవ నొప్పులు రావడంతో ఈ ఘటన చోటుచేసుకుంది. పరిస్థితికి ప్రతిస్పందనగా, బస్సు డ్రైవర్ వెంటనే మార్గాన్ని మార్చాడు. అత్యవసర పరిస్థితి గురించి ఆసుపత్రికి తెలియజేసేందుకు నేరుగా త్రిసూర్‌లోని అమల ఆసుపత్రికి వెళ్లాడు. ఆసుపత్రికి చేరుకోగా, అప్పటికే మహిళ ప్రసవ దశలో ఉంది.

వైద్యులు, నర్సులు తక్షణమే వైద్యసహాయం అందించేందుకు వీలుగా ప్రయాణికులు బస్సు దిగారు. సోషల్ మీడియాలో పంచుకున్న విజువల్స్ బస్సు ఆసుపత్రి వద్ద ఆగిపోయిందని, వాహనంలో ఉన్న తల్లి, ఆమె నవజాత శిశువుకు సహాయం చేయడానికి సిబ్బంది పరుగెత్తుతున్నట్లు చూపిస్తుంది. సురక్షితమైన డెలివరీ చేయడానికి వైద్య బృందం బస్సులోకి అవసరమైన పరికరాలను తీసుకువచ్చింది.

అమలా హాస్పిటల్‌కు చెందిన డాక్టర్ యాసిర్ సులైమాన్ ఇలా అన్నారు. ''అప్పటికే ప్రసవ నొప్పి ప్రారంభం అయింది. ఆ సమయంలో, ఆమెను అత్యవసర విభాగానికి మార్చడం మాకు అసాధ్యం. మేము బిడ్డను బయటకు తీసి, బొడ్డు తాడును అక్కడే కత్తిరించాల్సి వచ్చింది. శిశువు, తల్లి క్షేమంగా ఉన్నారు. ప్రస్తుతం ఇద్దరూ బాగానే ఉన్నారు. ఇది మాకు భిన్నమైన రోజు, కొత్త విషయం'' అని డాక్టర్‌ యాసిర్ అన్నారు.