భారీ ఉగ్ర కుట్ర భగ్నం.. నలుగురు అనుమానిత ఉగ్రవాదుల అరెస్ట్!

పాకిస్థాన్ హ్యాండ్లర్ల ఆదేశాల మేరకు దేశంలోని కీలక ప్రాంతాలపై దాడులకు కుట్ర పన్నుతున్న నలుగురు అనుమానిత ఉగ్రవాదులను ఉత్తరప్రదేశ్ ఏటీఎస్ (ATS) శుక్రవారం (ఏప్రిల్ 3, 2026) అరెస్ట్ చేసింది. రైల్వే నెట్‌వర్క్, మిలిటరీ స్థావరాలు మరియు ప్రముఖ రాజకీయ నాయకులే లక్ష్యంగా వీరు రెక్కీ నిర్వహిస్తున్నట్లు అధికారులు వెల్లడించారు. సోషల్ మీడియా ద్వారా సరిహద్దు అవతలి వ్యక్తులతో నిరంతరం సంబంధాలు కలిగి ఉండి, దేశ వ్యతిరేక కార్యకలాపాలకు పాల్పడుతున్నారనే నిఘా వర్గాల సమాచారంతో ఈ ఆపరేషన్ చేపట్టినట్లు ఏటీఎస్ ఒక ప్రకటనలో తెలిపింది.

ముఖ్యంగా మీరట్ జిల్లాకు చెందిన సాకిబ్ (అలియాస్ డెవిల్) అనే వ్యక్తిని పోలీసులు అదుపులోకి తీసుకున్నారు. ఇతడు టెలిగ్రామ్, సిగ్నల్ మరియు ఇన్‌స్టాగ్రామ్ వంటి ఎన్‌క్రిప్టెడ్ ప్లాట్‌ఫారమ్‌ల ద్వారా పాకిస్థానీ హ్యాండ్లర్లతో టచ్‌లో ఉన్నట్లు ప్రాథమిక విచారణలో తేలింది. సాకిబ్ నుంచి సేకరించిన సమాచారం మేరకు, గౌతమ్ బుద్ధ నగర్‌కు చెందిన వికాస్ గెహ్లావత్ (అలియాస్ రౌనక్), లోకేష్ (అలియాస్ పాప్లా పండిట్/బాబు/సంజు) తో పాటు మీరట్‌కు చెందిన అర్బాబ్ అనే మరో వ్యక్తిని కూడా అరెస్ట్ చేశారు. దేశంలోని కీలక పోలీస్ స్టేషన్లు మరియు సున్నితమైన ప్రాంతాల సమాచారాన్ని వీరు పాకిస్థాన్‌కు చేరవేస్తున్నట్లు అధికారులు నిర్ధారించారు.