పెళ్లి వేడుకలో విషాదం.. రసగుల్లా గొంతుకు అడ్డుపడి వ్యక్తి మృతి

జార్ఖండ్‌లో జరిగిన ఒక పెళ్లి వేడుకలో అత్యంత దురదృష్టకర సంఘటన చోటుచేసుకుంది. పెళ్లి విందులో రసగుల్లా తింటూ లలిత్ సింగ్ (41) అనే వ్యక్తి మరణించాడు. శుక్రవారం అర్థరాత్రి దాటిన తర్వాత (సుమారు ఒంటి గంట సమయంలో) గ్రామస్థులతో కలిసి భోజనం చేస్తున్నప్పుడు ఈ ప్రమాదం జరిగింది. లలిత్ సింగ్ రసగుల్లా తింటుండగా అది అకస్మాత్తుగా గొంతులో ఇరుక్కుపోయింది. దీంతో ఆయనకు శ్వాస తీసుకోవడం కష్టతరమైంది.

రసగుల్లా గొంతులో అడ్డుపడగానే లలిత్ సింగ్ ముఖం పాలిపోయి, శ్వాస కోసం గాలిని పీల్చుకోవడానికి తీవ్రంగా ఇబ్బంది పడ్డారు. ఇది గమనించిన బంధువులు, గ్రామస్థులు ఆయన గొంతులో ఇరుక్కున్న స్వీటును బయటకు తీయడానికి శతవిధాలా ప్రయత్నించారు. పరిస్థితి విషమిస్తుండటంతో వెంటనే ఆయన్ని ఎంజీఎం (MGM) ఆసుపత్రికి తరలించారు. అయితే, వైద్యులు పరీక్షించి అప్పటికే ఆయన మరణించినట్లు ప్రకటించారు. రసగుల్లా శ్వాసనాళాన్ని పూర్తిగా మూసివేయడం వల్ల శరీరానికి ఆక్సిజన్ అందక ఈ మరణం సంభవించిందని వైద్యులు వివరించారు.

శనివారం పోస్టుమార్టం నిర్వహించిన అనంతరం మృతదేహాన్ని కుటుంబ సభ్యులకు అప్పగించారు. ఎంతో ఉత్సాహంగా సాగాల్సిన పెళ్లి వేడుక ఈ ఘటనతో ఒక్కసారిగా మూగబోయింది. ఆనందంతో నిండిన గ్రామం లలిత్ సింగ్ మరణంతో తీవ్ర దిగ్భ్రాంతికి లోనైంది. చిన్న అజాగ్రత్త లేదా అనుకోని ప్రమాదం ఎంతటి పెను విషాదాన్ని మిగిలిస్తుందోననడానికి ఈ ఘటనే నిదర్శనం.