ఐఎన్ఎస్ రణవీర్‌లో పేలుడు.. ముగ్గురు మృతి
Three Navy Sailors Killed in Explosion on INS Ranvir at Mumbai Dockyard.భార‌త నౌకాద‌ళానికి చెందిన ఐఎన్ఎస్ రణ్‌వీర్‌లో
By తోట వంశీ కుమార్‌
భార‌త నౌకాద‌ళానికి చెందిన ఐఎన్ఎస్ రణ్‌వీర్‌లో ప్రమాదం జ‌రిగింది. ముంబై డాక్‌యార్డ్‌లో నిలిచి ఉన్న ఐఎన్ఎస్ రణ్‌వీర్‌లో మంగ‌ళ‌వారం సాయంత్రం పేలుడు సంభ‌వించింది. దీంతో పెద్ద ఎత్తున మంట‌లు చెల‌రేగాయి. ఈ ఘ‌ట‌న‌లో ముగ్గురు మ‌ర‌ణించ‌గా.. మ‌రో 11 మంది తీవ్రంగా గాయ‌ప‌డ్డారు. ఐఎన్ఎస్ రణ్‌వీర్‌లోని ఇంటర్నల్‌ కంపార్ట్‌మెంట్‌లో ఈ ప్రమాదం జ‌రిగింది. గాయ‌ప‌డిన వారిని ముంబైలోని ఐఎన్ఎస్ అశ్విన్ ఆస్ప‌త్రికి త‌ర‌లించి చికిత్స అందిస్తున్నారు.
ఘ‌ట‌న జ‌రిగిన వెంట‌నే నౌక‌లోని ఇత‌ర సిబ్బంది త‌క్ష‌ణ‌మే స్పందించి ప‌రిస్థితులు అదుపులోకి తెచ్చారు. దీంతో పెను ప్రమాదం త‌ప్పింది. కాగా.. ఈ ప్రమాదం కార‌ణంగా నౌక‌లోని కీల‌క మెటీరియ‌ల్ ఏమీ దెబ్బ‌తిన‌లేద‌ని అధికారులు తెలిపారు. మృతి చెందిన వారి వివరాల్ని నౌకాదళం ఇంకా వెల్లడించలేదు. ఈ పేలుడు ప్రమాదవశాత్తూ సంభ‌వించింద‌ని నేవీ అధికారులు ప్రాథ‌మిక నిర్థార‌ణ‌కు వ‌చ్చారు. ప్ర‌మాదానికి గ‌ల కార‌ణాల‌పై విచార‌ణ క‌మిటీని ఏర్పాటు చేశారు.
ఏప్రిల్ 21, 1986న ఐఎన్ఎస్ రణవీర్ ఇండియన్ నేవీలోకి ప్రవేశించింది. ప్రస్తుతం ఈ నౌక తూర్పు నౌకాదళంలో క్రాస్ కోస్ట్ ఆపరేషన్స్‌లో సేవలందిస్తోంది. సోవియట్ యూనియన్‌లో ఈ నౌకను నిర్మించారు. ఇందులో మొత్తం 325 మంది సిబ్బంది విధులు నిర్వర్తిస్తుంటారు. ఈ యుద్ధనౌక గంటకు 35 నాటికల్ మైళ్ల వేగంతో ప్ర‌యాణించ‌గ‌ల‌దు.
