'20-25 మంది కాంగ్రెస్ ఎంపీలు స్పీక‌ర్ ఛాంబర్‌కి వెళ్లి దుర్భాషలాడారు'

లోక్‌సభ స్పీకర్ ఓం బిర్లాపై ప్రతిపక్షాలు తీసుకొచ్చిన అవిశ్వాస తీర్మానం నేపథ్యంలో.. కేంద్ర పార్లమెంటరీ వ్యవహారాల మంత్రి కిరణ్ రిజిజు కాంగ్రెస్‌పై తీవ్ర ఆరోపణలు చేశారు. చాలా మంది కాంగ్రెస్ ఎంపీలు స్పీకర్ చాంబర్‌కి వెళ్లి తన ప‌ట్ల‌ అసభ్యకరమైన పదజాలం ఉపయోగించారని ఆయన అన్నారు. ఈ సంఘటన స్పీకర్ ఓం బిర్లాను తీవ్రంగా బాధించిందని రిజిజు అన్నారు. విలేకరులతో మాట్లాడుతూ.. తాను స్పీకర్‌తో వ్యక్తిగతంగా మాట్లాడానని రిజిజు అన్నారు.

దాదాపు 20-25 మంది కాంగ్రెస్ ఎంపీలు స్పీకర్ ఛాంబర్ వద్దకు చేరుకుని తనతో అనుచితంగా ప్రవర్తించారని ఆరోపించారు. ఆ సమయంలో ప్రియాంక గాంధీ వాద్రా, కెసి వేణుగోపాల్ సహా సీనియర్ కాంగ్రెస్ నాయకులు అక్కడే ఉన్నారని, నిరసన తెలుపుతున్న ఎంపీలను రెచ్చగొడుతున్నారని రిజిజు ఆరోపించారు.

సభలో ప్రసంగం చుట్టూ ఉన్న వివాదాన్ని కూడా రిజిజు ప్రస్తావించారు. స్పీకర్ ఒక రూలింగ్ ఇచ్చారని, కానీ దానిని వారు పాటించలేదని ఆయన అన్నారు. రాహుల్ గాంధీ మాట్లాడటానికి ఎవరి అనుమతి అవసరం లేదని, తన ఇష్టానుసారం మాట్లాడతానని చెప్పారని ఆయన అన్నారు. పార్లమెంటులో నియమాలు చాలా స్పష్టంగా ఉన్నాయని, స్పీకర్ అనుమతి లేకుండా ఏ సభ్యుడు మాట్లాడలేడని అన్నారు. స్పీకర్ అనుమతి ఇచ్చినప్పుడే ప్రధాని కూడా మాట్లాడతారని ఆయన అన్నారు. ప్రతి సభ్యుడు నియమాలను పాటించాల్సిందే. స్పీకర్ చాలా ప్రశాంతంగా ఉంటారని, లేకుంటే అలాంటి సంఘటనలో కఠిన చర్యలు తీసుకునే అవకాశం ఉండేదని ఆయన అన్నారు.