జమ్ముకశ్మీర్లో ఎన్కౌంటర్.. న‌లుగురు ఉగ్రవాదులు హతం.. మృతుల్లో పాక్ జేఈఎం కమాండర్
Pak JeM commander among four terrorists killed in Jammu and Kashmir encounters.జమ్ముకశ్మీర్లో గ‌త 12 గంట‌ల్లో
By తోట వంశీ కుమార్ Published on 12 March 2022 3:25 AM GMT
జమ్ముకశ్మీర్లో గ‌త 12 గంట‌ల్లో భద్రతా దళాలు, ఉగ్ర‌వాదుల‌కు మ‌ధ్య మూడు వేర్వేరు ప్రాంతాల్లో ఎదురుకాల్పులు చోటు చేసుకున్నాయి. పుల్వామా, గందర్‌బాల్ మరియు హంద్వారా ప్రాంతంలో జరిగిన మూడు ఎన్కౌంటర్లో మొత్తం న‌లుగురు ఉగ్రవాదులు హ‌త‌మ‌య్యారు. పుల్వామాలోని చెవాక్లాన్ ప్రాంతంలో జరిగిన ఎన్కౌంటర్లో పాకిస్థాన్‌కు చెందిన ఉగ్రవాద సంస్థ జైషే మహ్మద్ (జేఎం)కి చెందిన ఇద్దరు ఉగ్రవాదులు హతమైనట్లు పోలీసులు తెలిపారు. వారిలో ఒకరు 2018 నుంచి యాక్టివ్‌గా ఉన్న పాకిస్థానీ జేఎం కమాండర్ కమాల్ భాయ్‌గా గుర్తించారు.
గందర్‌బాల్‌లోని సెర్చ్ ప్రాంతంలో జరిగిన ఎన్కౌంటర్ తర్వాత పాకిస్తాన్ ఆధారిత లష్కరే తోయిబా (ఎల్‌ఇటి)తో సంబంధం ఉన్న మరో ఉగ్రవాది హతమయ్యాడు. ఆ ప్రాంతంలో ఉగ్రవాద వ్యతిరేక ఆపరేషన్ ఇంకా కొనసాగుతోందని పోలీసులు తెలిపారు. హంద్వారాలోని రాజ్వార్ ప్రాంతంలోని నెచామాలో జరిగిన ఎన్కౌంటర్లో ఒక లష్కరేటర్ ఉగ్రవాది హతమయ్యాడు.
శుక్రవారం రాత్రి భద్రతా బలగాలు నాలుగు నుంచి ఐదు చోట్ల సంయుక్త ఆపరేషన్లు ప్రారంభించాయని, దీంతో ఇద్దరు జెఎమ్ ఉగ్రవాదులు, ఇద్దరు లష్కరేటర్ ఉగ్రవాదులు హతమయ్యారని కశ్మీర్ ఇన్‌స్పెక్టర్ జనరల్ ఆఫ్ పోలీస్ విజయ్ కుమార్ తెలిపారు. భద్రతా బలగాలు ఒక ఉగ్రవాదిని కూడా సజీవంగా పట్టుకున్న‌ట్లు తెలిపారు. హంద్వారా, పుల్వామాలో ఎన్‌కౌంటర్లు ముగిశాయ‌ని, గందర్‌బాల్ సెర్చ్ ఆపరేషన్లు ఇంకా కొనాసాగుతున్న‌ట్లు ఆయ‌న వెల్ల‌డించారు.
శుక్రవారం జమ్మూ కాశ్మీర్‌లోని కుల్గామ్ జిల్లాలో సర్పంచ్ హత్యకు గురైన తర్వాత ఎన్‌కౌంటర్లు జరిగాయి. స్వతంత్ర సర్పంచ్ షబీర్ అహ్మద్ మీర్ పై అత‌డి నివాసానికి స‌మీపంలో ఉగ్రవాదులు కాల్పుల‌కు పాల్ప‌డ్డారు. తీవ్ర‌గాయాలైన అత‌డిని స‌మీపంలోని ఆస్ప‌త్రికి త‌ర‌లించారు. అయితే.. అప్ప‌టికే అత‌డు ప్రాణాలు కోల్పోయిన‌ట్లు వైద్యులు తెలిపారు. పౌరులను.. ముఖ్యంగా హిందువులు మరియు సిక్కులు, మతపరమైన మైనారిటీలను లక్ష్యంగా చేసుకున్న హత్యల తర్వాత భద్రతా దళాలు లోయలో తీవ్రవాద వ్యతిరేక కార్యకలాపాలను ముమ్మరం చేశాయి.
