ముంబై ఎయిర్‌పోర్టులో భారీగా బంగారం స్వాధీనం.. 24 మంది మహిళా స్మగ్లర్ల అరెస్ట్!

ముంబైలోని ఛత్రపతి శివాజీ మహారాజ్ అంతర్జాతీయ విమానాశ్రయం వేదికగా సాగుతున్న భారీ బంగారు స్మగ్లింగ్ నెట్‌వర్క్‌ను డైరెక్టరేట్ ఆఫ్ రెవెన్యూ ఇంటెలిజెన్స్ (DRI) అధికారులు ఛేదించారు. 'ఆపరేషన్ ధాహబు బ్లిట్జ్' (Operation Dhahabu Blitz) పేరుతో చేపట్టిన ఈ మెరుపు దాడిలో ఏకంగా 29.37 కిలోల బంగారాన్ని స్వాధీనం చేసుకున్నారు. దీని విలువ మార్కెట్లో సుమారు రూ. 37.74 కోట్లు ఉంటుందని అధికారులు అంచనా వేస్తున్నారు. ఈ అక్రమ రవాణాకు పాల్పడిన 24 మంది విదేశీ మహిళా క్యారియర్లను అధికారులు అరెస్ట్ చేశారు.

నైరోబి (కెన్యా) నుండి వస్తున్న మహిళా ప్రయాణికులు పెద్ద ఎత్తున బంగారాన్ని తరలిస్తున్నట్లు అందిన పక్కా సమాచారంతో డిఆర్ఐ ముంబై జోనల్ యూనిట్ ఈ తనిఖీలు చేపట్టింది. పట్టుబడిన మహిళల బ్యాగులు మరియు దుస్తులలో దాచిన 25.10 కిలోల బంగారు బిస్కెట్లు, 4.27 కిలోల బంగారు ఆభరణాలను స్వాధీనం చేసుకున్నారు. ఈ స్మగ్లింగ్ ముఠా చాలా పకడ్బందీగా వ్యవహరిస్తోందని, విమానాశ్రయ భద్రతా తనిఖీలను ఎలా తప్పించుకోవాలో ఈ మహిళలకు ప్రత్యేక శిక్షణ ఇచ్చారని అధికారులు గుర్తించారు.

ఈ ఆపరేషన్‌కు పెట్టిన 'ధాహబు' అనే పదానికి స్వహిలి భాషలో బంగారం అని అర్థం. ఈ ఏడాది ముంబై విమానాశ్రయంలో జరిగిన అతిపెద్ద దాడులలో ఇది ఒకటిగా అధికారులు పేర్కొంటున్నారు. పట్టుబడిన నిందితులను కోర్టులో హాజరుపరచనున్నట్లు, ఈ అంతర్జాతీయ స్మగ్లింగ్ రాకెట్ వెనుక ఉన్న అసలు సూత్రధారులను (Kingpins) పట్టుకునేందుకు లోతైన దర్యాప్తు కొనసాగిస్తున్నట్లు అధికారులు వెల్లడించారు.