ఫించన్ల పంపిణీలో భారీగా అక్రమాలు.. 1500 మంది ఉద్యోగులపై ప్రభుత్వం చర్యలు

అర్హులైన వారికి మాత్రమే పింఛను అందేలా చూడాలని ఆర్థిక శాఖ ఆదేశాల మేరకు ఇన్ఫర్మేషన్ కేరళ మిషన్ నిర్వహించిన ఆడిట్‌లో సంచలన అక్రమాలు వెలుగులోకి వచ్చాయి. కేరళ రాష్ట్రంలోని గెజిటెడ్ అధికారులు, కళాశాల ప్రొఫెసర్‌లతో సహా 1,498 మంది రాష్ట్ర అధికారులు సమాజంలోని బలహీన వర్గాల ప్రజలకు అందే సామాజిక భద్రతా పెన్షన్‌లను మోసపూరితంగా అందుకుంటున్నారని కేరళ ప్రభుత్వం ఆదేశించిన ఒక తనిఖీలో వెల్లడైంది.

అర్హులైన వారికే పింఛను అందేలా చూడాలని ఆర్థిక శాఖ నుంచి ఆదేశాలు రావడంతో ఇన్ఫర్మేషన్ కేరళ మిషన్ నిర్వహించిన ఆడిట్‌లో అక్రమాలు వెలుగులోకి వచ్చాయి. సమాజంలోని బలహీన వర్గాలకు చెందిన దాదాపు 62 లక్షల మందికి కేరళ ప్రభుత్వం నెలవారీ పెన్షన్‌గా రూ.1,600 అందజేస్తోంది. అవకతవకల తర్వాత, ఉద్యోగుల నుండి దుర్వినియోగమైన పెన్షన్ మొత్తాలను వడ్డీతో సహా వసూలు చేయాలని ప్రభుత్వం నిర్ణయించింది. దీంతో పాటు సంబంధిత వ్యక్తులపై కఠిన చర్యలు తీసుకోవాలని ఆర్థిక మంత్రి కేఎన్ బాలగోపాల్ ఆదేశించారు.

అనర్హులను గుర్తించేందుకు తదుపరి పరిశీలన కొనసాగుతుందని ఆర్థిక శాఖ హామీ ఇచ్చింది. సంక్షేమ వ్యవస్థ సమగ్రతను కాపాడుతూ అర్హులైన లబ్ధిదారులకు సరైన పింఛను పంపిణీకి చర్యలు తీసుకుంటామని కెఎన్ బాలగోపాల్ మీడియాతో అన్నారు. ఇలాంటి మోసాలను వెలికితీసేందుకు వివిధ స్థాయిల్లో తనిఖీలు కొనసాగించాలని ఆర్థిక శాఖ నిర్ణయించినట్లు మంత్రి తెలిపారు.