నిందితుడిని లాయర్ తుపాకీతో కాల్చేందుకు యత్నం.. ఏకంగా కోర్టులోనే..!

పంజాబ్‌లోని రూప్‌నగర్‌లోని ఒక వ్యక్తి రివాల్వర్‌తో కోర్టులోకి ప్రవేశించాడు. రెండు రోజుల రిమాండ్ తర్వాత రూప్‌నగర్ గురుద్వారాలో గురు గ్రంథ్‌ సాహిబ్‌ను అపవిత్రం చేసిన జస్బీర్ సింగ్‌ను కోర్టులో హాజరుపరిచారు. రివాల్వర్‌తో కోర్టులోకి ప్రవేశించిన వ్యక్తిని సాహెబ్ సింగ్ ఖుర్ల్‌గా గుర్తించారు. అతను మొరిండా నివాసి, న్యాయవాది. పోలీసులు అతడిని అదుపులోకి తీసుకుని ప్రశ్నిస్తున్నారు. రూప్‌నగర్ గురుద్వారాలో జరిగిన అపవిత్ర ఘటనపై ఖుర్ల్ కలత చెందాడు. నిందితుడిని హత్య చేయాలనుకున్నాడు. ఈ క్రమంలోనే గన్‌తో కోర్టులోకి ప్రవేశించి పోలీసులకు అడ్డంగా దొరికిపోయాడు.

పంజాబ్‌లోని మొరిండాలోని ఒక గురుద్వారాలో జరిగిన అపవిత్ర ఘటనకు సంబంధించిన వీడియో సోషల్ మీడియాలో కనిపించడంతో పంజాబ్ ముఖ్యమంత్రి భగవంత్ మాన్ చర్య తీసుకుంటామని హామీ ఇచ్చారు. వీడియోలో, జస్బీర్ సింగ్ మొరిండాలోని గురుద్వారా కొత్వాలి సాహిబ్ గర్భగుడిలోకి ప్రవేశించి, ఇద్దరు గ్రాంథిలను (పూజారి) కొట్టడం, గురు గ్రంథ్ సాహిబ్‌ను అపవిత్రం చేయడం కనిపించింది. మరో వీడియో నిందితుడు జస్బీర్ సింగ్‌ను గురుద్వారా లోపల భక్తులు కొట్టడం చూపించింది. అనంతరం అతడిని పోలీసులకు అప్పగించి ఎఫ్‌ఐఆర్‌ నమోదు చేశారు. రెండు రోజుల రిమాండ్‌ తర్వాత ఇవాళ కోర్టులో హాజరుపరిచారు.