ఇంజిన్ వైఫల్యం.. విశాఖ - ఢిల్లీ విమానానికి తప్పిన ప్రమాదం!

విశాఖపట్నం నుండి ఢిల్లీకి వస్తున్న ఇండిగో విమానం (6E 579) శనివారం ఉదయం ఇందిరాగాంధీ అంతర్జాతీయ విమానాశ్రయంలో అత్యవసరంగా ల్యాండ్ అయింది. విమానం గాలిలో ఉండగానే ఇంజిన్ వైఫల్యం చెందినట్లు పైలట్ గుర్తించి ఏటీసీ (ATC) అధికారులను అప్రమత్తం చేశారు. దీంతో విమానాశ్రయంలోని రన్‌వే 28 వద్ద అధికారులు వెంటనే 'ఫుల్ ఎమర్జెన్సీ' ప్రకటించారు. అగ్నిమాపక యంత్రాలు, అత్యవసర సేవా విభాగాలను సిద్ధంగా ఉంచారు.

సురక్షితంగా 161 మంది ప్రయాణికులు:

బోయింగ్ 737 రకానికి చెందిన ఈ విమానంలో మొత్తం 161 మంది ప్రయాణికులు ఉన్నారు. ఉదయం 10:53 గంటలకు ఎమర్జెన్సీ ల్యాండింగ్ సమాచారం అందగా, 11 గంటల ప్రాంతంలో విమానం సురక్షితంగా కిందికి దిగింది. ప్రయాణికులందరినీ సురక్షితంగా విమానం నుండి ఖాళీ చేయించామని, ఎవరికీ ఎలాంటి గాయాలు కాలేదని విమానాశ్రయ వర్గాలు వెల్లడించాయి. ఢిల్లీ ఫైర్ సర్వీసెస్ (DFS) సిబ్బంది వెంటనే రంగంలోకి దిగి పరిస్థితిని సమీక్షించారు. విమానానికి ఎలాంటి నష్టం వాటిల్లలేదు.

మళ్ళీ బోయింగ్ 737 విమానమే:

గత నెలలో కూడా ఢిల్లీ నుండి లేహ్ వెళ్తున్న స్పైస్ జెట్ విమానంలో ఇలాగే ఇంజిన్ సమస్య తలెత్తి ఢిల్లీకి తిరిగి రావాల్సి వచ్చింది. ఆ విమానం కూడా బోయింగ్ 737 కావడం గమనార్హం. వరుసగా ఈ మోడల్ విమానాల్లో ఇంజిన్ వైఫల్యాలు తలెత్తుతుండటం ఇప్పుడు విమానయాన రంగంలో చర్చనీయాంశంగా మారింది. ఈ ఘటనపై పౌర విమానయాన డైరెక్టరేట్ జనరల్ (DGCA) విచారణకు ఆదేశించే అవకాశం ఉంది.