'60 ఏళ్లు పైబడిన వృద్ధులకు ఉచిత చికిత్స'.. సంజీవని యోజన పథకాన్ని ప్ర‌క‌టించిన కేజ్రీవాల్

ఆమ్ ఆద్మీ పార్టీ (AAP) అధినేత‌, మాజీ ముఖ్యమంత్రి అరవింద్ కేజ్రీవాల్ ఢిల్లీలో వృద్ధుల కోసం సంజీవని యోజనను ప్రారంభించినట్లు ప్రకటించారు. ఈ పథకం కింద, ఢిల్లీలో 60 ఏళ్లు పైబడిన వృద్ధులందరికీ ఉచిత చికిత్స అందించబడుతుంది. వృద్ధుల చికిత్సకు అయ్యే ఖర్చు మొత్తాన్ని ఢిల్లీ ప్రభుత్వం భరిస్తుందని కేజ్రీవాల్ ప్రకటించారు.

ఈ పథకాన్ని ప్రకటించిన అరవింద్ కేజ్రీవాల్ మాట్లాడుతూ.. ఢిల్లీ ప్రజల కోసం నేను సంజీవని తీసుకొచ్చాను. 60 ఏళ్లు పైబడిన వృద్ధులకు ఢిల్లీలో ఉచిత వైద్యం లభిస్తుంది. చికిత్సకు అయ్యే మొత్తం ఖర్చును ఢిల్లీ ప్రభుత్వం భరిస్తుంది. ఇది కేజ్రీవాల్ హామీ. ఆమ్ ఆద్మీ పార్టీ కార్యకర్తలు ఇంటింటికీ తిరుగుతూ రిజిస్ట్రేషన్ చేయనున్నారని తెలిపారు.

ప్రభుత్వ లేదా ప్రైవేట్ ఆసుపత్రుల్లో ఉచిత చికిత్స ఉంటుందని ఢిల్లీ మాజీ సీఎం కేజ్రీవాల్ తెలిపారు. ఎగువ పరిమితి ఉండదని.. APL, BPL కార్డు అవసరం లేదని అన్నారు. దీని రిజిస్ట్రేషన్ రెండు మూడు రోజుల్లో ప్రారంభమవుతుంది. మా కార్యకర్తలు మీ ఇంటికి వస్తారు. మీకు కార్డు ఇస్తారు. భద్రంగా ఉంచండి. ఎన్నికల తర్వాత ఆమ్ ఆద్మీ పార్టీ ప్రభుత్వం ఏర్పడితే పక్కా ప్రణాళిక రూపొందించి అమలు చేస్తామన్నారు.

గతంలో అరవింద్ కేజ్రీవాల్ మహిళల కోసం మహిళా సమ్మాన్ యోజనను ప్రకటించారు. ఈ పథకం కింద అర్హులైన మహిళల ఖాతాలకు ప్రభుత్వం ప్రతి నెలా వెయ్యి రూపాయలు పంపుతుంది. అదే సమయంలో కేజ్రీవాల్ ఎన్నికల తర్వాత మహిళలకు రూ.1000 బదులు రూ.2100 ఇవ్వాలని కూడా నిర్ణ‌యించింది.

ఆప్ కన్వీనర్ అరవింద్ కేజ్రీవాల్ పార్టీ కార్యాలయంలో క్యాబినెట్ నిర్ణయాన్ని తెలియజేశారు. మళ్లీ ఆప్ ప్రభుత్వం ఏర్పడితే ఈ మొత్తాన్ని రూ.2100కు పెంచుతామని కేజ్రీవాల్ ప్రకటించారు. అరవింద్ కేజ్రీవాల్ ప్రకారం.. ప్రతి నెలా ప్రతి మహిళ ఖాతాలో కొంత డబ్బు జమ చేస్తామని గత మార్చిలో హామీ ఇచ్చారు. 18 ఏళ్లు నిండిన ప్రతి మహిళ ఈ పథకం ద్వారా ప్రయోజనం పొందుతుంది. ఇందుకోసం మహిళలు రిజిస్ట్రేషన్ చేసుకోవాల్సి ఉంటుంది. నమోదు చేసుకున్న మహిళలకు ప్రతి నెలా వారి ఖాతాల్లో డబ్బులు జ‌మ చేస్తారు.