Video: ముంబై విమానాశ్రయంలో అగ్నిప్రమాదం

ముంబైలోని ఛత్రపతి శివాజీ మహారాజ్ అంతర్జాతీయ విమానాశ్రయం (CSMIA) టెర్మినల్-1 వద్ద గురువారం సాయంత్రం అగ్నిప్రమాదం సంభవించింది. విమానాశ్రయ ఆవరణలోని 1-బి సర్కిల్ సమీపంలో ఉన్న మూడు అంతస్తుల భవనం గ్రౌండ్ ఫ్లోర్‌లో మంటలు చెలరేగాయి. సమాచారం అందుకున్న అగ్నిమాపక సిబ్బంది, పోలీసులు మరియు విమానాశ్రయ అత్యవసర బృందాలు వెనువెంటనే స్పందించి మంటలను అదుపులోకి తెచ్చాయి. ప్రాథమిక సమాచారం ప్రకారం, షార్ట్ సర్క్యూట్ కారణంగానే సాయంత్రం 6:10 గంటల సమయంలో ఈ ప్రమాదం జరిగినట్లు విమానాశ్రయ ప్రతినిధి ధృవీకరించారు.

ఈ ఘటన వల్ల విమానాశ్రయ కార్యకలాపాలకు ఎటువంటి ఆటంకం కలగలేదు. ప్రయాణికులు మరియు విమాన సర్వీసులు యథావిధిగా కొనసాగాయి. అగ్నిప్రమాదం జరిగిన సమయంలో దట్టమైన పొగ రావడంతో ప్రయాణికులు కాసేపు ఆందోళనకు గురయ్యారు, అయితే పరిస్థితిని నిమిషాల్లోనే అదుపులోకి తీసుకురావడంతో పెను ప్రమాదం తప్పింది. ఈ ఘటనలో ఎవరికీ ఎటువంటి గాయాలు కాలేదని అధికారులు స్పష్టం చేశారు.

మరోవైపు, ముంబై నుంచి బెంగళూరు వెళ్లాల్సిన ఎయిర్ ఇండియా (AI2812) విమానం సాంకేతిక కారణాల వల్ల టేకాఫ్ అయిన కొద్దిసేపటికే తిరిగి ముంబై చేరుకుంది. గాలిలో ఉండగా సాంకేతిక సమస్య తలెత్తినట్లు గుర్తించిన పైలట్, భద్రతా ప్రోటోకాల్స్ ప్రకారం విమానాన్ని వెనక్కి మళ్లించారు. ప్రయాణికులు సురక్షితంగా ఉన్నారని, వారికి ప్రత్యామ్నాయ విమానాన్ని ఏర్పాటు చేసినట్లు ఎయిర్ ఇండియా ప్రతినిధి తెలిపారు. ప్రస్తుతం ఆ విమానాన్ని నిపుణులు క్షుణ్ణంగా తనిఖీ చేస్తున్నారు.