నీట్‌ యూజీ వివాదం.. సుప్రీంకోర్టు కీలక వ్యాఖ్యలు

నీట్‌ - యూజీ 2024 కేసుపై విచారణ చేపట్టిన సుప్రీంకోర్టు కీలక వ్యాఖ్యలు చేసింది. వ్యవస్థను మోసం చేసిన వ్యక్తి డాక్టర్‌ అయితే సమాజానికి మరింత హానికరమని వ్యాఖ్యానించింది. పరీక్షకు సిద్ధమైన పిల్లల కష్టాన్ని మరిచిపోవద్దని, 0.001 శాతం నిర్లక్ష్యం ఉన్నా దానిని పూర్తిగా పరిష్కరించాలని కేంద్ర ప్రభుత్వాన్ని, నేషనల్‌ టెస్టింగ్‌ ఏజెన్సీని సుప్రీంకోర్టు ఆదేశించింది. నీట్‌ - యూజీ -2024లో జరిగిన అవకతవకలకు సంబంధించిన అభ్యర్థనలపై నేషనల్‌ టెస్టింగ్‌ ఏజెన్సీ ప్రతిస్పందించాలని నోటీసులు జారీ చేసింది.

విచారణ సందర్భంగా ధర్మాసనం మాట్లాడుతూ.. ‘0.001% నిర్లక్ష్యం ఎవరిదైనా సరే, దానిని క్షుణ్ణంగా పరిష్కరించాలి. "వ్యవస్థను మోసం చేసిన వ్యక్తి డాక్టర్ అవుతాడని ఊహించుకోండి, అతను సమాజానికి మరింత హానికరం" అని జస్టిస్ విక్రమ్ నాథ్, ఎస్వీఎన్ భట్టిలతో కూడిన ధర్మాసనం పేర్కొంది. ఔత్సాహికులు ప్రవేశ పరీక్షకు సిద్ధమయ్యారని, "మేము వారి శ్రమను మరచిపోలేము" అని సుప్రీం కోర్టు ఎత్తి చూపింది. నీట్‌-యూజీకి వ్యతిరేకంగా దాఖలైన పిటిషన్‌లను ‘ప్రత్యర్థి వ్యాజ్యం’గా పరిగణించవద్దని, తప్పులను సరిదిద్దుకోవాలని కేంద్రానికి, ఎన్‌టీఏకు ధర్మాసనం తెలిపింది.

"పరీక్షను నిర్వహించే ఏజెన్సీగా, మీరు న్యాయంగా వ్యవహరించాలి. పొరపాటు జరిగితే, అవును, ఇది పొరపాటు అని చెప్పండి. కనీసం మీ పనితీరుపై విశ్వాసాన్ని కలిగిస్తుంది" అని ధర్మాసనం ఎన్టీఏకి తెలిపింది. టెస్టింగ్ ఆర్గనైజేషన్ నుండి "సకాలంలో చర్య" ఆశిస్తున్నట్లు సుప్రీంకోర్టు పేర్కొంది. ఈ కేసులో తదుపరి విచారణను జూలై 8న జాబితా చేసింది.

హైదరాబాద్‌లో స్టూడెంట్స్‌ మార్చ్‌..

నీట్ పరీక్షను రద్దు చేయాలని హిమాయత్ నగర్ వై జంక్షన్ నుండి లిబర్టీ వరకు స్టూడెంట్ మార్చ్ నిర్వహించారు. ఏఐఎస్ఎఫ్, ఎన్ఎస్‌యూఐ, ఎస్ఎఫ్ఐ, పిడిఎస్‌యూ, విద్యార్థి జన సమితి, ఆమ్ ఆద్మీ పార్టీ విద్యార్థి విభాగం, ఏఐవైఎఫ్, డివైఎఫ్ఐ, పివైఎల్ విద్యార్థి యువజన సంఘాల ఆధ్వర్యంలో భారీ ర్యాలీ నిర్వహించారు. పెద్ద ఎత్తున విద్యార్థులందరూ ర్యాలీ నిర్వహించడంతో లిబర్టీ దగ్గర కొంత కోలాహల వాతావరణం ఏర్పడింది. నీట్ పేపర్ లీకేజీపై సుప్రీంకోర్టు జడ్జితో విచారణ జరిపించాలని విద్యార్థి సంఘాలన్నీ డిమాండ్ చేస్తున్నాయి. లీకేజీ తో సంబంధం ఉన్న దోషులను కఠినంగా శిక్షించాలని విద్యార్థులు డిమాండ్ చేశారు. కొంతమంది వ్యక్తులు కలిసి ఒక్కో విద్యార్థి నుండి 30 లక్షల నుండి 32 లక్షలు తీసుకొని పేపర్ లీకేజ్ స్కాంకు పాల్పడ్డారని అట్టి వారిపై తక్షణమే చర్యలు తీసుకోవాలని కోరారు.