ఈ జలపాతానికి 'అమితాబ్‌ బచ్చన్' పేరేలా వచ్చిందంటే?

వాటర్ ఫాల్స్.. ప్రకృతి అందాలకు నిలువెత్తు నిదర్శనాలు. ఎత్తైన కొండల నుంచి ధారళంగా ప్రవహించే నీరు వీక్షకులను మంత్రముగ్ధులను చేస్తుంది. అలాంటి వాటర్ ఫాల్స్ భారత్‌లో చాలానే ఉన్నాయి. సాధారణంగా వాటర్‌ఫాల్స్‌కు ఆ ప్రాంత వాసులు ఏదో ఒక పేరు పెడుతుంటారు. అయితే ఇప్పుడు మనం చెప్పుకోబోయే వాటర్‌ఫాల్‌కు వెరైటీగా అమితాబ్ బచ్చన్ పేరు పెట్టారు. ఆ వాటర్‌ఫాల్‌కు బిగ్‌బీ పేరు ఎందుకు పెట్టారు? అది ఎక్కడ ఉంది?

అమితాబ్ బచ్చన్ అనగానే మనకు ముందుగా గుర్తొచ్చేది ఆయన ఎత్తు. ఆయన 6 అడుగుల కంటే ఎక్కువ ఎత్తు ఉంటారు. ఈ వాటర్‌ఫాల్ కూడా చాలా ఎత్తులో ఉంటుంది. మిగతా వాటర్‌ఫాల్స్ కంటే పొడవుగా ఉంటుంది. అందుకే దీనిని అమితాబ్ వాటర్‌ఫాల్ స్థానికులు పిలవడం మొదలుపెట్టారు. ఈ వాటర్‌ఫాల్‌కు టూరిస్టుల తాకిడి ఎక్కువే. తన పేరు మీద వాటర్‌ఫాల్ ఉందనే విషయం 2019 వరకు బిగ్‌బీకి తెలియదు. ఓ ట్విటర్ యూజర్ ఈ వాటర్‌ఫాల్స్‌కు తన పేరును పెట్టారని తెలుసుకుని బిగ్‌బీ ఆశ్చర్యపోయారు.

ఈ వాటర్‌ఫాల్‌ను చూడాలంటే నార్త్‌ ఈస్ట్‌కు వెళ్లాలి. ఉత్తర సిక్కిం జిల్లాలోని లాచుంగ్‌లోని చుంగ్తాంగ్‌ని యుమ్‌తంగ్ వ్యాలీకి కలిపే రోడ్డ పక్కన ఇది ఉంది. ఇది ఎత్తైన జలపాతాల్లో ఒకటి. ఈ ఫాల్స్‌ను భిమ్‌నాలా లేదా భెవ్మా ఫాల్స్ అని కూడా అంటారు. లాచుంగ్ గ్రామం నుండి 13 కిలోమీటర్ల దూరంలో, గాంగ్‌టక్ నగరం నుండి 118 కిలోమీటర్ల దూరంలో సముద్రమట్టానికి 8,610 అడుగుల ఎత్తులో ఈ వాటర్‌ఫాల్ ఉంది. ఈ జలపాతాన్ని చేరుకోవడానికి లాచుంగ్ నుండి క్యాబ్‌ ద్వారా వెళ్లొచ్చు. గ్యాంగ్‌టక్ నుండి లాచుంగ్‌కు వెళ్లడానికి 6 గంటలు పడుతుంది, ఆపై లాచుంగ్ నుండి భేవ్మా జలపాతానికి మరో గంట పడుతుంది. చుట్టుపక్కల అడవులు ఎంతో ఆకర్షణీయంగా ఉంటాయి.