హైవే ప్రయాణికులకు అలర్ట్.. నేటి నుంచి ఫాస్టాగ్‌ తప్పనిసరి.. లేదంటే..

నేటి (ఏప్రిల్ 10, 2026) నుండి జాతీయ రహదారులపై ఉన్న టోల్ ప్లాజాల వద్ద నగదు చెల్లింపులను పూర్తిగా నిలిపివేస్తున్నట్లు కేంద్ర రహదారి రవాణా మరియు రహదారుల మంత్రిత్వ శాఖ (MoRTH) ప్రకటించింది. ఇకపై టోల్ రుసుములను కేవలం ఫాస్టాగ్‌ (FASTag) లేదా యూపీఐ (UPI) వంటి డిజిటల్ పద్ధతుల్లో మాత్రమే చెల్లించాల్సి ఉంటుంది. టోల్ బూత్‌ల వద్ద వాహనాల రద్దీని తగ్గించడానికి, ప్రయాణ సమయాన్ని ఆదా చేయడానికి, జాతీయ రహదారులపై ప్రయాణాన్ని మరింత సులభతరం చేయడానికి ప్రభుత్వం ఈ నిర్ణయం తీసుకుంది.

ఒకవేళ వాహనానికి చెల్లుబాటు అయ్యే ఫాస్టాగ్‌ లేకపోతే, సదరు వాహనదారులు సాధారణ టోల్ రుసుము కంటే 1.25 రెట్లు అదనంగా యూపీఐ ద్వారా చెల్లించాల్సి ఉంటుంది. ఒకవేళ రుసుము చెల్లించడానికి నిరాకరిస్తే, నేషనల్ హైవే ఫీ రూల్స్, 2008 ప్రకారం వారిని అనుమతించకపోయే అధికారం అధికారులకు ఉంటుంది. ఇక కెమెరాలు లేదా ఆర్‌ఎఫ్‌ఐడీ (RFID) సిస్టమ్‌ల ద్వారా టోల్ చెల్లించకుండా వెళ్లే వాహనాల యజమానులకు ఈ-నోటీసులు పంపబడతాయి. మూడు రోజుల్లోగా సాధారణ రుసుము చెల్లించని యెడల, రెట్టింపు జరిమానా కట్టాల్సి వస్తుంది.

టోల్ మినహాయింపుల విషయంలో కూడా ప్రభుత్వం కీలక మార్పులు చేస్తోంది. ప్రభుత్వ అధికారులు తమ వ్యక్తిగత ప్రయాణాలకు ఐడీ కార్డులను చూపి టోల్ మినహాయింపు పొందడాన్ని అరికట్టేందుకు, ఇకపై 'ఎగ్జెంప్టెడ్ ఫాస్టాగ్‌' (Exempted FASTags) లేదా వార్షిక పాస్‌లను మాత్రమే అనుమతించనున్నారు. మరోవైపు, వాహనాలు టోల్ ప్లాజాల వద్ద ఆగాల్సిన అవసరం లేకుండానే రుసుమును కట్ చేసే 'మల్టీ-లేన్ ఫ్రీ-ఫ్లో టోలింగ్' వ్యవస్థపై ఎన్.హెచ్.ఏ.ఐ (NHAI) కసరత్తు చేస్తోంది. ఈ విధానంలో వాహనాలు ప్రయాణిస్తుండగానే ఆటోమేటిక్‌గా నిధులు డెబిట్ అవుతాయి.