పుట్‌పాత్‌ పైకి దూసుకెళ్లిన ట్రక్కు.. ముగ్గురు దుర్మరణం

దేశరాజధాని ఢిల్లీలో ఘోర రోడ్డు ప్రమాదం సంభవించింది. రోడ్డు పక్కన ఉన్న ఫుట్‌పాత్‌పైకి ఉన్నట్లుండి వేగంగా ఒక ట్రక్కు దూసుకెళ్లింది. ఈ ప్రమాదంలో ముగ్గురు వ్యక్తులు అక్కడికక్కడే ప్రాణాలు కోల్పోయారు. ఈ సంఘటన స్థానికంగా భయాందోళనకు గురి చేసింది.

ఢిల్లీ పోలీసులు తెలిపిన వివరాల ప్రకారం.. శాస్త్రిపార్క్‌ దగ్గర సోమవారం ఉదయం ఈ రోడ్డు ప్రమాదం జరిగింది. సాధారణంగానే ఫుట్‌పాత్‌పై భిక్షాటన చేసే వారు కొందరు నిద్రపోతుంటారు. అయితే.. తెల్లవారుజామున ఈ ప్రమాదం జరిగినట్లు తెలుస్తోంది. రోడ్డుపక్కన ఫుట్‌పాత్‌పై కొందరు వ్యక్తులు పడుకుని ఉన్నారు. ఒక ట్రక్కు వేగంగా వచ్చి అదుపు తప్పింది. దాంతో.. ఫుట్‌పాత్‌పైకి దూసుకెళ్లింది. ఈ ప్రమాదంలో ట్రక్కు కింద పడిన ముగ్గురు వ్యక్తులు ప్రాణాలు కోల్పోయారు. ఈ సంఘటన తర్వాత డ్రైవర్ ట్రక్కును వదిలేసి అక్కడి నుంచి పారిపోయాడు. సమాచారం అందుకున్న స్థానిక పోలీసులు వెంటనే అక్కడికి చేరుకున్నారు. మృతదేహాలను పోస్టుమార్టం కోసం ఆస్పత్రికి తరలించారు. అలాగే.. పలువురు ఈ ప్రమాదంలో గాయపడినట్లు తెలిసింది. వారిని ఆస్పత్రికి తరలించి చికిత్స చేయిస్తున్నామని ఢిల్లీ పోలీసులు తెలిపారు. కేసు నమోదు చేసుకుని దర్యాప్తు చేస్తున్నట్లు చెప్పారు. పారిపోయిన డ్రైవర్ కోసం పోలీసులు గాలింపు చర్యలు కొనసాగిస్తున్నారు.