వయనాడ్‌లో 143కు చేరిన మృతుల సంఖ్య.. వేలాది మందిని రక్షించిన సైన్యం
వయనాడ్‌లోని మెప్పాడి సమీపంలోని కొండ ప్రాంతాలలో భారీ కొండచరియలు విరిగిపడటంతో 143 మంది మరణించారు
By అంజి Published on 31 July 2024 8:45 AM IST
వయనాడ్‌లో 143కు చేరిన మృతుల సంఖ్య.. వేలాది మందిని రక్షించిన సైన్యం
వయనాడ్‌లోని మెప్పాడి సమీపంలోని కొండ ప్రాంతాలలో భారీ కొండచరియలు విరిగిపడటంతో 143 మంది మరణించారు. సుమారు 130 మంది గాయపడ్డారని కేరళ ఆరోగ్య మంత్రి వీణా జార్జ్ తెలిపారు. మంగళవారం నాలుగు గంటల వ్యవధిలో వాయనాడ్‌లో మూడు కొండచరియలు విరిగిపడటంతో ఎన్‌డిఆర్‌ఎఫ్‌తో సహా పలు ఏజెన్సీలు, సైన్యం సహాయక చర్యల కోసం రంగంలోకి దిగాయి.
చిక్కుకున్నట్లు అనుమానిస్తున్న వ్యక్తులను కనుగొనడానికి రెస్క్యూ ఆపరేషన్లు తిరిగి ప్రారంభమైనందున, తప్పిపోయిన వ్యక్తుల సంఖ్యను గుర్తించడానికి జిల్లా అధికారులు బుధవారం డేటాను సేకరించడం ప్రారంభించారు. జిల్లా ఎమర్జెన్సీ ఆపరేషన్ సెంటర్‌కు చెందిన ప్రత్యేక బృందం ఈ ప్రాంతంలో నివసిస్తున్న వారి సంఖ్య, కొండచరియలు విరిగిపడిన తరువాత కనుగొనబడిన వారు, తప్పిపోయిన వ్యక్తుల సంఖ్యపై డేటాను క్రోడీకరించింది.
జిల్లాలోని ముండక్కై, చూరల్‌మల, అత్తమాల, నూల్‌పుజా జిల్లాల్లో అత్యంత దారుణంగా దెబ్బతిన్నాయి. చలియార్ నదిలో పలువురు కొట్టుకుపోయారు. భారీ వర్షాల కారణంగా కొండచరియలు విరిగిపడటంతో జిల్లాలో శాశ్వత వంతెన కొట్టుకుపోవడంతో ఆర్మీ తాత్కాలిక వంతెనను ఉపయోగించి 1,000 మందికి పైగా ప్రజలను రక్షించినట్లు వార్తా సంస్థ పీటీఐ రిపోర్ట్‌ చేసింది. గత 15 రోజులుగా ఆర్మీ అప్రమత్తంగా ఉందని, మంగళవారం కేరళ ప్రభుత్వం వారిని సంప్రదించిందని ఆర్మీ సీనియర్ అధికారి ఒకరు పిటిఐకి తెలిపారు.
వాయనాడ్‌లో మొత్తం 45 సహాయ శిబిరాలను ఏర్పాటు చేశారు. అక్కడే 3,069 మందికి వసతి కల్పించారు. జిల్లాలో వైద్య బృందాలతో సహా మొత్తం 225 మంది ఆర్మీ సిబ్బందిని సహాయక చర్యల కోసం మోహరించారు. మరోవైపు తిరువంతపురంలో దాదాపు 140 మంది ఆర్మీ సిబ్బంది సిద్ధంగా ఉన్నారు. రెండు వైమానిక దళ హెలికాప్టర్లు, ఒక Mi-17, ఒక ALH (అడ్వాన్స్‌డ్ లైట్ హెలికాప్టర్) కూడా రెస్క్యూ ఆపరేషన్‌ల కోసం మోహరించబడ్డాయి.
భారత నౌకాదళానికి చెందిన బృందం సహాయక చర్యలకు సహకరిస్తుందని కేరళ ఆరోగ్య మంత్రి తెలిపారు. రెస్క్యూ ఆపరేషన్స్‌లో సహాయం కోసం న్యూఢిల్లీ నుండి అనేక స్నిఫర్ డాగ్‌లను తెస్తున్నారు. జిల్లాలో భారీ వర్షాలు కురుస్తున్నందున మరోసారి కొండచరియలు విరిగిపడే అవకాశాలు ఉన్నాయని ఎన్‌డిఆర్‌ఎఫ్ సిబ్బందిని ఉటంకిస్తూ ఎఎన్‌ఐ తెలిపింది. జిల్లాలో కొండచరియలు విరిగిపడిన నేపథ్యంలో కంట్రోల్ రూమ్‌ను ప్రారంభించారు. అత్యవసర సహాయం కోసం హెల్ప్‌లైన్ నంబర్లు 9656938689 మరియు 8086010833 కూడా జారీ చేయబడ్డాయి.
అన్ని సహాయక చర్యల పర్యవేక్షణ కోసం పారా రెజిమెంట్‌ కింద కాలికట్‌లో నియంత్రణ కేంద్రం ఏర్పాటు చేయబడింది.
ప్రధానమంత్రి మోడీ కేరళ ముఖ్యమంత్రితో మాట్లాడుతున్నారు
ప్రధాని నరేంద్ర మోదీ కేరళ ముఖ్యమంత్రి పినరయి విజయన్‌తో మాట్లాడి సహాయం చేస్తామని హామీ ఇచ్చారు. మృతుల కుటుంబాలకు రూ. 2 లక్షలు, క్షతగాత్రులకు రూ. 50,000 చొప్పున ప్రధాని ప్రకటించారు.
రాహుల్ గాంధీ సంతాపాన్ని తెలియజేశారు
కొండచరియలు విరిగిపడి మరణించిన వారి కుటుంబ సభ్యులకు ప్రతిపక్ష నేత, వాయనాడ్ ఎంపీ రాహుల్ గాంధీ సంతాపం తెలిపారు. "నేను కేరళ ముఖ్యమంత్రి, వయనాడ్ జిల్లా కలెక్టర్‌తో మాట్లాడాను, రెస్క్యూ ఆపరేషన్లు జరుగుతున్నాయని నాకు చెప్పారు. అన్ని ఏజెన్సీలతో సమన్వయం ఉండేలా చూసుకోవాలని, కంట్రోల్ రూమ్ ఏర్పాటు చేయాలని నేను వారిని అభ్యర్థించాను. సహాయక చర్యలకు అవసరమైన ఏదైనా సహాయం గురించి మాకు తెలియజేయండి" అని రాహుల్ గాంధీ తన ఎక్స్‌ పోస్ట్‌లో పేర్కొన్నారు.
