అశ్లీల కంటెంట్ ప్రసారం.. ఐదు OTT ప్లాట్‌ఫామ్‌లపై కేంద్రం నిషేధం

అశ్లీల కంటెంట్‌ను ప్రసారం చేస్తున్న ఐదు ఓటీటీ యాప్స్‌పై కేంద్ర ప్రభుత్వం వేటు వేసింది. భారత ప్రభుత్వ సమాచార మరియు ప్రసార మంత్రిత్వ శాఖ సమాజంలో నైతిక విలువలను కాపాడేందుకు కీలక నిర్ణయం తీసుకుంది. అశ్లీల మరియు అసభ్యకరమైన కంటెంట్‌ను ప్రసారం చేస్తున్నట్లు గుర్తించిన MoodXVIP, Koyal Playpro, Digi Movieplex, Feel, Jugnu అనే మొత్తం ఐదు ఓటీటీ ప్లాట్‌ఫామ్‌లను కేంద్రం నిషేధించింది. 2000 నాటి ఇన్ఫర్మేషన్ టెక్నాలజీ (IT) యాక్ట్ లోని సెక్షన్ 69A ప్రకారం ఈ ప్లాట్‌ఫామ్‌లను బ్లాక్ చేస్తూ కేంద్ర ప్రభుత్వం ఉత్తర్వులు జారీ చేసింది.

మంగళవారం నుండి ఈ నిర్ణయం అమలులోకి వచ్చింది. ఈ ప్లాట్‌ఫామ్‌లకు యాక్సెస్‌ను నిలిపివేయాలని ఇంటర్నెట్ సర్వీస్ ప్రొవైడర్లకు (ISPs) స్పష్టమైన ఆదేశాలు అందాయి. డిజిటల్ మాధ్యమాల్లో ప్రజా మర్యాద, నైతిక ప్రమాణాలు పాటించడంలో ఈ ప్లాట్‌ఫామ్‌లు విఫలమయ్యాయని, అశ్లీలతను ప్రోత్సహిస్తున్నాయని అధికారులు నిర్ధారించారు.

ఐటీ నిబంధనలు 2021 కింద డిజిటల్ కంటెంట్‌ను పర్యవేక్షించే ప్రక్రియలో భాగంగా ఈ చర్యలు తీసుకున్నారు. జాతీయ ప్రయోజనాలు మరియు నైతిక విలువలను రక్షించడమే లక్ష్యంగా ప్రభుత్వం ఈ నిర్ణయం తీసుకుంది. ప్రభుత్వ నిబంధనలను అతిక్రమించి, సమాజానికి హానికరమైన కంటెంట్‌ను ప్రసారం చేసే ఏ డిజిటల్ ప్లాట్‌ఫామ్ పైన అయినా భవిష్యత్తులో కూడా ఇటువంటి కఠిన చర్యలు కొనసాగుతాయని అధికారులు హెచ్చరించారు.