గర్భం దాల్చిన బీఎస్‌ఎఫ్‌ ఆడ కుక్క.. విచారణకు ఆదేశించిన కోర్టు

మేఘాలయకు ఆనుకుని ఉన్న బంగ్లాదేశ్ సరిహద్దులో బోర్డర్ సెక్యూరిటీ ఫోర్స్ (BSF)కి చెందిన ఆడ కుక్క గర్భం దాల్చడంతో కలకలం రేగింది. లాల్సీ అనే కుక్క మూడు కుక్కపిల్లలకు జన్మనిచ్చింది. ఇంతకీ, ఆడ కుక్క ఎలా గర్భవతి అయింది? అనేది తెలుసుకోవడానికి కోర్టు విచారణకు ఆదేశించింది. అయితే, ఈ విచారణ ఉత్తర్వు కేవలం బోర్డర్‌ సెక్యూరిటీ ఫోర్స్‌ నిబంధనల ప్రకారం మాత్రమే జారీ చేయబడింది.

43వ బెటాలియన్‌కు చెందిన ఆడ కుక్క లాల్సీ డిసెంబర్ 5న బోర్డర్ ఔట్‌పోస్ట్ (బీఓపీ) బాగ్మారాలో మూడు కుక్కపిల్లలకు జన్మనిచ్చింది. బీఎస్‌ఎఫ్‌ ప్రాంతీయ ప్రధాన కార్యాలయం, షిల్లాంగ్.. ఈ విషయంపై కోర్టు విచారణకు ఆదేశించింది. దీని బాధ్యతను బీఎస్ఎఫ్ డిప్యూటీ కమాండెంట్ అజిత్ సింగ్‌కు అప్పగించారు. దీనికి సంబంధించి నివేదికను సమర్పించాలని ఆదేశించింది. బీఎస్‌ఎఫ్‌ ఆడ కుక్కలు హై సెక్యూరిటీ ఏరియాలో, దాని ట్రైనర్‌ని నిరంతరం పర్యవేక్షిస్తున్నప్పటికీ గర్భం దాల్చకూడదు.

అసలు విషయం ఏమిటంటే.. బీఎస్‌ఎఫ్‌తో సహా ఇతర కేంద్ర బలగాలలో స్నిఫర్ డాగ్‌ల శిక్షణ, పెంపకం, టీకాలు వేయడం, ఆహారం, ఆరోగ్యం గురించి కూడా ప్రత్యేక జాగ్రత్తలు తీసుకోబడతాయి. అదే సమయంలో.. నిబంధనల ప్రకారం కుక్కలు బీఎస్‌ఎఫ్‌ వెటర్నరీ విభాగం సలహా, పర్యవేక్షణలో మాత్రమే సంతానోత్పత్తికి అనుమతించబడతాయి. కుక్కల శిక్షకులు వాటిని పర్యవేక్షించడానికి తరచుగా పోస్ట్ చేయబడతారు. చాలా తక్కువ వ్యవధిలో వాటి ఆరోగ్యాన్ని క్రమం తప్పకుండా తనిఖీ చేస్తారు.

అలాగే బీఎస్‌ఎఫ్‌ క్యాంప్, BOP లేదా మరేదైనా డ్యూటీలో పోస్ట్ చేయబడిన స్నిఫర్ డాగ్‌లు క్యాంప్‌ ప్రదేశాలు దాటి బయటి ప్రదేశాలకు వెళ్లడానికి అనుమతించబడవు. ఆ కుక్కలు క్యాంపుల్లోనే ఉండేలా భద్రతా వలయం ఉంది. రూల్స్‌ ప్రకారం.. బయటి కుక్కలు కూడా శిబిరంలోకి ప్రవేశించకూడదు.