బెంగళూరు మాల్‌కు పన్ను నోటీసు.. రైతు ఎఫెక్ట్‌ మాములుగా లేదుగా

బెంగళూరులోని జీటీ వరల్డ్ మాల్.. ధోతీ ధరించాడనే కారణంగానే వృద్ధ రైతుకు ప్రవేశం నిరాకరించడంతో వారం రోజుల పాటు మూసివేయాలని ప్రభుత్వం ఆదేశించింది. తాజాగా మాల్‌కు అధికారులు ట్యాక్స్‌ (పన్ను) నోటీసు పంపారు. ఆస్తిపన్ను రూ.3.56 కోట్లకు పైగా బకాయి ఉందని అధికారులు తెలిపారు. పౌర సంస్థ బృహత్ బెంగళూరు మహానగర పాలికే (BBMP) మాల్‌కు నోటీసు జారీ చేసింది. జూలై 31 లోపు పెండింగ్ బకాయిలను చెల్లించాలని వారిని ఆదేశించింది. గడువులోగా చెల్లించకపోతే మాల్‌ను మూసివేస్తామని పౌర అధికారులు హెచ్చరించారు. షాపింగ్ మాల్‌కు సంబంధించిన ట్రేడ్ లైసెన్స్‌ను కూడా సస్పెండ్ చేశారు.

"బీబీఎంపీ చట్టం 2020 సెక్షన్ 156 ప్రకారం.. 06-12-2023 నాటి సర్క్యులర్‌లో మీ ట్రేడ్ లైసెన్స్ సస్పెండ్ చేయబడింది మరియు బకాయి ఆస్తి పన్ను చెల్లించనందుకు ఆస్తికి సీలు వేయబడింది" అని మాల్ ప్రవేశద్వారంపై వద్ద ఉంచిన నోటీసు పేర్కొంది. అయితే బీబీఎంపీ నోటీసులో పేర్కొన్న రూ.3.56 కోట్లు కాకుండా రెండేళ్ల ఆస్తిపన్ను రూ.1.78 కోట్లు చెల్లించాల్సి ఉందని జీటీ మాల్ యాజమాన్యం పేర్కొంది.

వృద్ధ రైతుకు ధోతిలో ప్రవేశం నిరాకరించడంపై మాల్ యామమాన్యం నుండి బీబీఎంపీ వివరణ కోరింది.

కర్ణాటక మునిసిపల్ కార్పొరేషన్ నిబంధనల ప్రకారం, సమాజం పెద్దగా ఆమోదించలేని నిబంధనలను విధించినట్లయితే, ఏదైనా బహిరంగ ప్రదేశం ఒక వారం పాటు మూసివేయబడుతుంది. అయితే, ఈ నిబంధనను జిల్లా కమిషనర్ లేదా స్థానిక పోలీసులు మాత్రమే అమలు చేయగలరు.

జూలై 17న, ఒక వృద్ధుడు, అతని కుమారుడి వీడియో బయటపడింది. రైతు, అతని కుమారుడిని జీటీ మాల్‌లోకి ప్రవేశించడానికి సిబ్బంది నిరాకరించారు. సినిమా టిక్కెట్లు బుక్ చేసుకున్నప్పటికీ, ధోతీ ధరించారనే ఆరోపణలతో వారికి ప్రవేశం నిరాకరించబడింది. వైరల్ వీడియో విమర్శలకు ఆజ్యం పోసింది. సోషల్ మీడియా ప్లాట్‌ఫారమ్‌లలో చర్చలకు దారితీసింది. వృద్ధుడిని "అగౌరవపరిచిన" GT మాల్ మేనేజ్‌మెంట్‌పై చర్య తీసుకోవాలని చాలా మంది పిలుపునిచ్చారు. ఈ అంశంపై ప్రతిపక్ష బీజేపీ నేతలు సిద్ధరామయ్య ప్రభుత్వాన్ని టార్గెట్ చేశారు.

ఎదురుదెబ్బ తగిలిన తర్వాత, మాల్ యజమాని ప్రశాంత్, ఇది "విచారకరమైన సంఘటన" అని పిలిచాడు. "మా నాన్న అతనితో [రైతు] ఫోన్‌లో మాట్లాడాడు. నేను మాల్ లోపల అతనితో మాట్లాడి అతనికి క్షమాపణలు చెబుతాను" అని చెప్పాడు.