ఆర్‌ఎస్‌ఎస్ ప్రధాన కార్యాలయంలో రణవీర్ సింగ్.. మోహన్ భాగవత్‌తో భేటీ?

బాలీవుడ్ స్టార్ హీరో రణవీర్ సింగ్ నాగ్‌పూర్‌లోని రాష్ట్రీయ స్వయంసేవక్ సంఘ్ (RSS) వ్యవస్థాపకుడు కేశవ్ బలిరామ్ హెడ్గేవార్ స్మారకార్థం నిర్మించిన హెడ్గేవార్ స్మృతి మందిరాన్ని సందర్శించడం చర్చనీయాంశంగా మారింది. శుక్రవారం సాయంత్రం ముంబై నుండి ప్రత్యేక విమానంలో నాగ్‌పూర్ చేరుకున్న ఆయన, నేరుగా రేషింబాగ్ ప్రాంతంలోని స్మృతి మందిర్ సముదాయానికి వెళ్లి హెడ్గేవార్ స్మారకానికి నివాళులర్పించారు. ఈ సందర్భంగా ఆయన ఆ సంస్థలోని పలువురు సీనియర్ సభ్యులతో కొంతసేపు చర్చలు జరిపారు.

ఈ పర్యటనలో భాగంగా రణవీర్ సింగ్ ఆర్‌ఎస్‌ఎస్ చీఫ్ మోహన్ భాగవత్‌ను కూడా కలిసినట్లు సమాచారం. ఆర్‌ఎస్‌ఎస్ ప్రధాన కార్యాలయంలో వీరిద్దరి మధ్య సమావేశం జరిగినట్లు తెలిసినప్పటికీ, ఈ భేటీకి సంబంధించిన ఎజెండా లేదా వివరాలపై ఆర్‌ఎస్‌ఎస్ వర్గాలు ఎలాంటి అధికారిక ప్రకటన విడుదల చేయలేదు. రణవీర్ సందర్శన చాలా క్లుప్తంగా సాగిందని, ఆయన వివిధ అంశాలపై చర్చించారని అక్కడి వర్గాలు ధృవీకరించాయి.

రణవీర్ సింగ్ తన రాబోయే ప్రాజెక్ట్ పనుల్లో బిజీగా ఉన్న సమయంలో ఈ పర్యటన జరగడం విశేషం. విమానాశ్రయ అధికారుల సమాచారం ప్రకారం, ఆయన సాయంత్రం 4 గంటలకు నాగ్‌పూర్ చేరుకుని, తిరిగి రాత్రి 8 గంటల సమయంలో ముంబైకి బయలుదేరి వెళ్లారు. ఒక అగ్ర నటుడు ఆర్‌ఎస్‌ఎస్ ప్రధాన కార్యాలయాన్ని సందర్శించడం, ఉన్నత స్థాయి నాయకత్వంతో భేటీ కావడం అటు సినీ, ఇటు రాజకీయ వర్గాల్లో ఆసక్తిని రేకెత్తిస్తోంది.