ఎంపీ రాఘ‌వ్ చ‌ద్దాకు షాక్.. మైక్ ఇవ్వొద్దని రాజ్యసభ సెక్రటేరియట్‌కు లేఖ రాసిన ఆమ్ ఆద్మీ పార్టీ

సభలో తమ డిప్యూటీ లీడర్ అయిన రాఘవ్ చద్దాను పదవి నుంచి తొలగించాలని కోరుతూ ఆమ్ ఆద్మీ పార్టీ రాజ్యసభ సెక్రటేరియట్‌కు లేఖ రాసింది. ఆప్ కోటా నుండి రాఘవ్ చద్దాకు మాట్లాడేందుకు సమయం ఇవ్వకూడదని కూడా ఆ పార్టీ తన లేఖలో పేర్కొంది. రాఘవ్ చద్దా స్థానంలో అశోక్ మిట్టల్‌ను డిప్యూటీ లీడ‌ర్‌గా నియమించాలని కోరుతూ ఆ పార్టీ రాజ్యసభ సెక్రటేరియట్‌కు ఒక లేఖ రాసింది.

అశోక్ మిట్టల్ ఆమ్ ఆద్మీ పార్టీ తరపున పంజాబ్ నుండి పార్లమెంట్ సభ్యునిగా ఉన్నారు. ఆయన ఏప్రిల్ 2022లో రాజ్యసభకు ఎన్నికయ్యారు. అప్పటి నుండి ఆయన రక్షణ కమిటీ, ఆర్థిక కమిటీతో సహా అనేక పార్లమెంటరీ కమిటీలలో పనిచేశారు. ఆయన ఫిబ్రవరి 2026లో భారత్-అమెరికా పార్లమెంటరీ స్నేహ బృందంలో సభ్యునిగా కూడా నియమితులయ్యారు.

ఆపరేషన్ సింధూర్ అనంతరం, డీఎంకే ఎంపీ కనిమొళి నేతృత్వంలో రష్యా, లాట్వియా, స్లోవేనియా, గ్రీస్, స్పెయిన్‌ దేశాలకు వెళ్లిన అఖిలపక్ష ప్రతినిధి బృందంలో అశోక్ మిట్టల్‌ను కూడా చేర్చారు.

రాఘవ్ చద్దా కూడా ఏప్రిల్ 2022 నుండి రాజ్యసభ ఎంపీగా ఉన్నారు. పార్లమెంటులో ఆయన లేవనెత్తిన సామాన్యుడి సమస్యల కారణంగా ఆయన కొంతకాలంగా వార్తల్లో నిలుస్తున్నారు.

గత నెలలో పంచాయతీ స్థాయిలో 'సర్పంచ్ పతి' లేదా 'పంచాయత్ పతి' పాత్రపై రాఘవ్ ఆందోళన వ్యక్తం చేశారు. మహిళా సర్పంచుల కోసం రిజర్వ్ చేయబడిన పంచాయతీ స్థానాలలో అసలైన అధికారం వారి భర్తలు లేదా మగ బంధువుల చేతిలోనే ఉందని ఆయన వాదించారు. రాజ్యాంగంలోని 73వ సవరణ ప్రకారం మహిళా ప్రతినిధులకు కల్పించిన హక్కులను వారు సక్రమంగా వినియోగించుకునేలా ప్రభుత్వం చర్యలు తీసుకోవాలని ఆయన డిమాండ్ చేశారు.

భారతదేశంలో 35 కోట్ల మందికి పైగా మహిళలు, బాలికలను ప్రభావితం చేసే ఋతుస్రావ పరిశుభ్రత అనేది ఆరోగ్యం, విద్య, సమానత్వానికి సంబంధించిన విషయమని రాఘవ్ చద్దా పార్లమెంటులో ఈ అంశాన్ని లేవనెత్తారు.

కేవలం శానిటరీ ప్యాడ్‌లు, నీరు, గోప్యత లేకపోవడం వల్ల బాలికలు చదువు మానేస్తే, అది వ్యక్తిగత వైఫల్యం కాదని, సామాజిక వైఫల్యమని చద్దా అన్నారు. సమాజం ఒక జీవశాస్త్ర వాస్తవాన్ని సామాజిక నిషిద్ధంగా మార్చిందని అన్నారు.

రాఘవ్ గత సంవత్సరం చివరి నెలల్లో, ఈ సంవత్సరం ప్రారంభంలో గిగ్ వర్కర్ల నిరసనలలో కూడా పాల్గొన్నాడు. వారి సమస్యలను మరింత బాగా అర్థం చేసుకోవడానికి, అతడు ఒక రోజంతా గిగ్ వర్కర్‌గా గడిపాడు.