వంట గ్యాస్‌ ఈ-కేవైసీకి ఆఖరి తేదీ.. క్లారిటీ ఇచ్చిన కేంద్రం

బోగస్ ఖాతాలను గుర్తించడానికి, తొలగించడానికి ఎల్‌పీజీ కస్టమర్ల కోసం చమురు మార్కెటింగ్ కంపెనీలు eKYC (ఎలక్ట్రానిక్ నో యువర్ కస్టమర్) ఆధార్ ప్రామాణీకరణను చేపడుతున్నట్లు కేంద్ర మంత్రి హర్దీప్ సింగ్ పూరి ప్రకటించారు. ఈ కార్యకలాపాలకు ఆయిల్ మార్కెటింగ్ కంపెనీలు గానీ, కేంద్ర ప్రభుత్వం గానీ ఎలాంటి గడువు విధించలేదని మంత్రి మంగళవారం స్పష్టం చేశారు. ఎల్‌పిజి వినియోగదారులు గ్యాస్ ఏజెన్సీలలో ఇ-కెవైసి ఆధార్‌ మస్టర్ ప్రక్రియను పూర్తి చేయాల్సిన ప్రస్తుత వ్యవస్థ వల్ల కలిగే ఇబ్బందుల గురించి సోమవారం లేఖలో ఆందోళన వ్యక్తం చేసిన కేరళ ప్రతిపక్ష నాయకుడు విడి సతీశన్ చేసిన అభ్యర్థనపై హర్దీప్‌ సింగ్‌ పూరీ సోషల్ మీడియా పోస్ట్ ద్వారా స్పందించారు.

గ్యాస్ ఏజెన్సీల్లో ఎల్‌పిజి మస్టరింగ్‌ను తప్పనిసరి చేస్తూ తీసుకున్న నిర్ణయం వల్ల సామాన్యులు ఎన్నడూ లేని విధంగా ఇబ్బందులు పడుతున్నారని, ఎల్‌పిజి మస్టరింగ్ వల్ల కలిగే అసౌకర్యాన్ని తగ్గించేందుకు అవసరమైన చర్యలు తీసుకోవాలని కేంద్ర మంత్రికి లేఖ రాస్తున్నట్లు విడి సతీశన్ సోమవారం తెలిపారు. మంత్రి హర్దీప్‌ సింగ్‌ పూరీ ప్రతిస్పందనగా, బోగస్ ఖాతాలను తొలగించడానికి చమురు మార్కెటింగ్ కంపెనీలు ఎల్‌పీజీ వినియోగదారుల కోసం eKYC ఆధార్ ప్రామాణీకరణను నిర్వహిస్తున్నాయని తెలిపారు. ఎనిమిది నెలలకు పైగా ఈ ప్రక్రియ కొనసాగుతోందని, సబ్సిడీ సిలిండర్ల దుర్వినియోగాన్ని అరికట్టేందుకు ఈ కార్యక్రమాన్ని ప్రారంభించామని ఆయన తెలిపారు.

LPG మస్టరింగ్ ప్రక్రియలో, సిలిండర్ డెలివరీ సిబ్బంది.. డెలివరీ అయిన తర్వాత కస్టమర్ ఆధారాలను ధృవీకరిస్తారు. మొబైల్ యాప్‌ని ఉపయోగించి, సిబ్బంది కస్టమర్ యొక్క ఆధార్ ఆధారాలను క్యాప్చర్ చేస్తారు. ప్రాసెస్‌ను పూర్తి చేయడానికి కస్టమర్ OTPని అందుకుంటారు. కస్టమర్‌లు తమ సౌలభ్యం మేరకు డిస్ట్రిబ్యూటర్ షోరూమ్‌ని కూడా సందర్శించవచ్చు లేదా స్వతంత్రంగా e-KYC ప్రక్రియను పూర్తి చేయడానికి OMC యాప్‌లను ఉపయోగించవచ్చు. అంతేకాకుండా, వినియోగదారులకు భరోసా ఇవ్వడానికి, నిజమైన వినియోగదారుడు ఎటువంటి ఇబ్బందులు లేదా అసౌకర్యానికి గురికాకుండా చూసేందుకు చమురు కంపెనీలు పత్రికల్లో వివరణను జారీ చేస్తున్నాయని మంత్రి పూరీ తెలిపారు.