Health: అరటిపండు ఏ సమయంలో తింటే మంచిది?.. హెల్త్‌ సైన్స్‌ ఏం చెబుతోంది

అరటిపండులో పొటాషియం, విటమిన్ B6 మరియు సహజ సిద్ధమైన చక్కెరలు పుష్కలంగా ఉంటాయి. అయితే, దీనిని ఏ సమయంలో తింటున్నారనేది మీ జీవనశైలి, ఆరోగ్య లక్ష్యాలపై ఆధారపడి ఉంటుంది. ఉదయాన్నే అరటిపండు తినడం వల్ల అందులోని గ్లూకోజ్, ఫ్రక్టోజ్, సుక్రోజ్ ద్వారా తక్షణ శక్తి లభిస్తుంది. అయితే, ఖాళీ కడుపుతో దీనిని తీసుకోవడం అందరికీ పడకపోవచ్చు. దీనివల్ల రక్తంలో చక్కెర స్థాయిలు ఒక్కసారిగా పెరిగి, తర్వాత నీరసానికి దారితీసే అవకాశం ఉంది. కాబట్టి, ఉదయం పూట దీనిని పెరుగు లేదా డ్రై ఫ్రూట్స్‌తో కలిపి తీసుకోవడం ఉత్తమం.

వ్యాయామం, మధ్యహ్న సమయాల్లో..

వ్యాయామానికి ముందు (Pre-workout) అరటిపండును ఒక అద్భుతమైన స్నాక్‌గా పరిగణిస్తారు. వర్కవుట్‌కు 30-60 నిమిషాల ముందు దీనిని తింటే, అందులోని పిండి పదార్థాలు తక్షణ ఇంధనాన్ని(శక్తిని) అందిస్తాయి, పొటాషియం కండరాల తిమ్మిర్లను నివారిస్తుంది. అలాగే, భోజనానికి భోజనానికి మధ్యలో ఆకలి వేసినప్పుడు జంక్ ఫుడ్‌కు బదులుగా అరటిపండును తీసుకోవడం వల్ల, అందులోని ఫైబర్ కడుపు నిండుగా ఉంచి అతిగా తినడాన్ని నివారిస్తుంది.

రాత్రి పూట తినవచ్చా?

రాత్రి సమయంలో అరటిపండు తినడం హానికరమని చాలామంది భావిస్తారు, కానీ ఇందులో వాస్తవం లేదు. అరటిపండులోని మెగ్నీషియం , ట్రిప్టోఫాన్ కండరాలను సడలించి, మంచి నిద్ర పట్టడానికి సహాయపడతాయి. అయితే, జీర్ణ సమస్యలు ఉన్నవారు రాత్రిపూట దీనిని తీసుకుంటే కొంచెం అసౌకర్యంగా అనిపించవచ్చు. ముఖ్యంగా మధుమేహం ఉన్నవారు ఇందులోని సహజ చక్కెరల దృష్ట్యా పరిమాణంపై శ్రద్ధ వహించాలి. అలాగే జీర్ణక్రియ సున్నితంగా ఉన్నవారు ఖాళీ కడుపుతో దీనిని తీసుకోకపోవడమే మంచిది.